Koha lëviz pak më shpejt në Hënë. Tani një grup ndërkombëtar astronomësh i janë bashkuar thirrjeve për t’i dhënë hënës orën e saj, në mënyrë që misionet e ardhshme hapësinore të mund të mbajnë gjurmët e minutave në trupin qiellor.

Bashkimi Ndërkombëtar Astronomik votoi të enjten, duke inkurajuar organizatat hapësinore anembanë globit që të bashkëpunojnë për një standard të matjes së kohës për Hënën, ku një ditë zgjat 29.5 ditë tokësore.

"Ky është thelbi i rezolutës sonë: të punojmë së bashku për të vendosur këtë kohë standarde," tha Susan Stewart e Observatorit Detar të SHBA këtë javë në konferencën e grupit në Cape Town, Afrika e Jugut. Stewart ndihmoi në propozimin e rezolutës.

Hëna ka më pak gravitacion në krahasim me Tokën, kështu që koha shkon me rreth 58.7 mikrosekonda më shpejt çdo ditë. Ndërsa më shumë vende dhe kompani private synojnë misionet e ardhshme hënore, astronomët duan të sigurojnë sinkronizim të përsosur me një orë të unifikuar. Aktualisht, një mision në Hënë shkon në kohën e kombit, që operon anijen kozmike.

Agjencia Evropiane e Hapësirës bëri presion vitin e kaluar për krijimin e një ore hënore. Dhe në fillim të këtij viti, Shtëpia e Bardhë udhëzoi NASA-n dhe agjencitë e tjera që të bashkojnë një ide fillestare deri në fund të vitit me një plan përfundimtar që pritet deri në fund të vitit 2026.

Astronomët janë ende në ditët e para të përcaktimit të saktë se si do të kalojë koha hënore, tha Bijunath Patla, një fizikant në Institutin Kombëtar të Standardeve dhe Teknologjisë.

"Unë mendoj se komuniteti e ka kuptuar se kjo duhet bërë," tha Patla. "Dhe ky është fillimi./ AP.