Turqia dhe Iraku kanë nënshkruar një memorandum mirëkuptimi për bashkëpunimin ushtarak, sigurinë dhe kundër terrorizmit, tha të enjten Ministri i Jashtëm turk Hakan Fidan, pas dy ditësh bisedimesh të nivelit të lartë të sigurisë në Ankara.

Vendet fqinje kanë qenë në mosmarrëveshje në vitet e fundit, lidhur me operacionet ushtarake ndërkufitare të Ankarasë kundër militantëve të jashtëligjshëm të Partisë së Punëtorëve të Kurdistanit (PKK), me bazë në rajonin malor të Irakut verior.

Iraku ka thënë se operacionet shkelin sovranitetin e tij, por Ankaraja thotë se ato janë të nevojshme për të mbrojtur veten.

Marrëdhëniet janë përmirësuar që nga viti i kaluar, kur ata ranë dakord të zhvillonin bisedime të nivelit të lartë për çështjet e sigurisë, dhe pas një vizite në prill të presidentit turk Rexhep Tajip Erdogan në Bagdad, ku ai tha se marrëdhëniet kishin hyrë në një fazë të re.

Ankaraja dhe Bagdadi mbajtën një raund të katërt takimesh këtë javë, si pjesë e mekanizmit të dialogut. Në mars, Iraku e quajti PKK-në një "organizatë të ndaluar në Irak" - një veprim i mirëpritur nga Turqia.

Fidan, duke folur së bashku me homologun e tij irakian Fuad Hussein pas bisedimeve të tyre në Ankara, tha se marrëveshja e nënshkruar nga ministrat e mbrojtjes të secilës palë kishte "rëndësi historike", ndërsa Hussein tha se ishte "e para në historinë e Irakut dhe Turqisë" në këtë fushë.

“Përmes qendrave të përbashkëta të koordinimit dhe trajnimit të planifikuara në këtë marrëveshje, ne besojmë se mund ta çojmë bashkëpunimin tonë në një nivel tjetër”, tha Fidan.

“Ne duam të avancojmë mirëkuptimin që po zhvillojmë me Irakun për kundër-terrorizmin. përmes hapave konkretë në terren”, shtoi ai.

Një burim diplomatik turk tha se, me marrëveshjen, një Qendër e Përbashkët Koordinuese e Sigurisë do të krijohet në Bagdad së bashku me një Qendër të Përbashkët të Trajnimit dhe Bashkëpunimit në Bashiqa. Hussein, duke folur për kampin e trajnimit Bashiqa, tha se "përgjegja do të jetë mbi forcat e armatosura të Irakut", pa dhënë detaje.

Të hënën, ministri turk i mbrojtjes Yasar Guler i tha Reuters se hapat e fundit të ndërmarra nga Turqia dhe Iraku në luftën kundër terrorizmit shënuan një pikë kthese në lidhjet, duke shtuar se Ankaraja dëshironte që Bagdadi të shkonte një hap më tej dhe ta etiketonte PKK-në një organizatë terroriste sa më shpejt të jetë e mundur.

PKK, e cila ka zhvilluar një kryengritje kundër shtetit turk që nga viti 1984, është cilësuar një organizatë terroriste nga Turqia, Shtetet e Bashkuara dhe Bashkimi Evropian. Më shumë se 40,000 njerëz janë vrarë në konflikt.