Presidenti brazilian Luiz Lula da Silva sugjeroi të enjten, se lideri venezuelian Nicolas Maduro mund të thërrasë zgjedhje të reja, që përfshijnë vëzhgues ndërkombëtarë si një zgjidhje e mundshme për krizën politike në vend.
Lula tha gjithashtu se një "qeveri koalicioni" mund të jetë një zgjidhje tjetër e mundshme për Venezuelën, pas zgjedhjeve të kontestuara presidenciale të 28 korrikut, të cilat Maduro dhe opozita pretendojnë se i kanë fituar.
"Nëse (Maduro) ka arsye të shëndoshë, ai mund t'ia paraqesë atë njerëzve, ndoshta duke thirrur zgjedhje të reja me një komitet zgjedhor jopartiak," tha Lula në një intervistë në radio.
Presidenti brazilian tha se ai ende nuk e njeh Maduron si fitues të votimit, dhe se qeveria e tij duhet të publikojë listën e votave që nuk janë publikuar.
“Maduro e di se i detyrohet Brazilit dhe botës një shpjegim”, tha Lula.
Brazili ka kërkuar, së bashku me fqinjin tjetër, Kolumbinë, të gjejë një zgjidhje për krizën në Venezuelë. Lula dhe homologu i tij kolumbian Gustavo Petro folën në telefon të mërkurën, por nuk u dhanë detaje të bisedës.
Presidenti i SHBA, Joe Biden tha të enjten se ai mbështet zgjedhjet e reja në Venezuelë.
Biden u foli gazetarëve në vazhdën e Brazilit, duke kërkuar një votim të ri, dy javë pasi udhëheqësi Nicolas Maduro pretendoi fitoren e rizgjedhjes, në një garë të vënë në dyshim nga vendet perëndimore.
Autoriteti elektoral i Venezuelës shpalli Maduro-n fitues të zgjedhjeve të korrikut me 51% të votave, megjithëse ende nuk ka bërë të ditur numrin e votave.
Opozita thotë se raporti i saj i detajuar tregon se Gonzalez ka të ngjarë të ketë marrë 67% të votave, duke fituar me një diferencë prej afro 4 milionë votash dhe ka ngarkuar në një faqe interneti kopje të skanuara të votave lokale.
Më shumë se dy javë pasi Maduro pretendoi fitoren e rizgjedhjes, Shtetet e Bashkuara dhe vendet e tjera perëndimore po tregojnë pak shenja të veprimit të shpejtë dhe të ashpër, ndaj asaj që shumë prej tyre e kanë dënuar si mashtrim në votim.
Përfaqësuesit e qeverisë dhe opozitës së Venezuelës kanë përjashtuar më parë idenë e zgjedhjeve të reja./ Reuters.
© SYRI.net