Një sulm ajror ndaj një automjeti në Sirinë lindore pranë kufirit poroz me Irakun, vrau të paktën pesë luftëtarë nga njësitë pro-Iraniane, thanë për Reuters dy burime të sigurisë në rajon.
Një nga burimet tha se sulmi u krye nga një dron, por nuk mund të specifikonte se cilit ushtri i përkiste droni. Burimi i dytë tha se kishte në shënjestër luftëtarët, teksa ndërronin turnet në një pikë kontrolli.
Një pjesë e kufirit lindor të Sirisë me Irakun kontrollohen nga grupe të armatosura të lidhura me Iranin dhe që luftuan në emër të forcave të armatosura të Sirisë gjatë gjithë luftës civile të vendit.
Ato përfshijnë grupe të armatosura irakiane që kontrollojnë gjithashtu anën irakiane të kufirit.
Kufiri është tani një qendër kontrabande, me armë të sjella nga Iraku në Siri dhe mallra të tjera që rrjedhin në Irak.
SHBA dhe Izraeli kanë kryer të dyja sulme në Siri kundër fraksioneve të lidhura me Iranin.
Që nga fillimi i luftës civile siriane në vitin 2011, Izraeli ka kryer qindra sulme duke synuar kryesisht pozicionet e ushtrisë dhe luftëtarët e mbështetur nga Irani, duke përfshirë grupin Hezbollah të Libanit.
Izraeli rrallë komenton për sulmet individuale në Siri.
Grupet e mbështetura nga Irani, duke përfshirë lëvizjen e fuqishme Hezbollah të Libanit, kanë forcuar forcat e presidentit Bashar al-Assad gjatë luftës civile në Siri.
Shtypja brutale e qeverisë siriane e një kryengritjeje të vitit 2011 shkaktoi konfliktin që ka vrarë më shumë se gjysmë milioni njerëz dhe ka tërhequr ushtritë e huaja dhe grupet ekstremiste.
© SYRI.net