Ankaraja anuloi vizitën e  Ministrit të Brendshëm turk Ali Yerlikaya në Athinë, e cila ishte planifikuar për të martën.

Ministri i Brendshëm turk ishte planifikuar të bënte një udhëtim ditor në Athinë për të pasur një drekë pune me ministrin grek të Mbrojtjes së Qytetarëve Michalis Chrisochoidis, Ministrin e Çështjeve Detare Christos Stylianides dhe Ministrin e Migracionit Nikos Panagiotopoulos.

Takimi do të fokusohej në çështjet e migracionit dhe sigurisë.

Por mediat greke njoftojnë se të hënën në mesditë, Athina u njoftua nga Ankaraja se vizita ishte anuluar, pa shpjegime të mëtejshme.

Sipas burimeve, pala greke ia atribuon këtë zhvillim tensioneve në rritje mes Athinës dhe Ankarasë ditët e fundit, të cilat kanë prishur klimën pozitive që ishte krijuar mes dy vendeve.

Madje, mbetet e paqartë nëse do të zhvillohen realisht takimet e rojes bregdetare greke dhe turke, të cilat pritej të mbaheshin gjatë verës.

Zyrtarët nga të dy vendet shkëmbyen disa deklarata të mprehta pas një incidenti javën e kaluar në të cilën anijet detare turke u mblodhën pranë ishujve Kassos dhe Karpathos.

Kjo ndodhi ndërsa anija kërkimore italiane Ievoli Relume po kryente studime për një lidhje të energjisë nënujore midis Kretës dhe Qipros.

Pavarësisht se ishin të autorizuara nga Greqia, luftanijet turke e paralajmëruan anijen se ajo kishte hyrë në ujërat e pretenduara nga Turqia si pjesë e shelfit të saj kontinental.

Që nga e mërkura, Ievoli Relume e kishte përfunduar kërkimin dhe ishte nisur për në Iraklio tës Kretës, pas përpjekjeve diplomatike për të ulur tensionet.