Ministrja e Jashtme e Australisë tha të martën se marrëveshja e fundit e mbrojtjes midis Koresë së Veriut dhe Rusisë ishte “destabilizuese” dhe “e rrezikshme për botën”.
Një gjë të tillë, siç shkruajnë mediat e huaja, përcjell Telegrafi, ajo e tha pasi vizitoi të martën fshatin e tensionuar kufitar që ndahet nga Koreja e Veriut dhe ajo e Jugut.
Në qershor, udhëheqësi i Koresë së Veriut, Kim Jong Un dhe presidenti rus Vladimir Putin nënshkruan një pakt që përcakton ndihmën e ndërsjellë ushtarake nëse ndonjë vend sulmohet, duke thelluar shqetësimet për zgjerimin e lidhjeve midis vendeve.
SHBA dhe partnerët e saj kanë akuzuar me vendosmëri Korenë e Veriut për furnizimin e Rusisë me armë konvencionale shumë të nevojshme për luftën e saj në Ukrainë në këmbim të ndihmës ushtarake dhe ekonomike.
“Unë gjithashtu dua të them diçka për paktin e sigurisë midis Koresë së Veriut dhe Rusisë. Dhe them përsëri, kjo është destabilizuese. Kjo është e rrezikshme për botën dhe përsëri them se Rusia po sillet në mënyra që nuk janë të favorshme për paqen, por janë përshkallëzuese”, u tha gazetarëve ministrja e Jashtme australiane, Penny Wong pas një vizite në anën jugore të fshatit kufitar Korean të Panmunjom.
Wong dënoi testet e raketave të Koresë së Veriut që sipas saj kërcënojnë sigurinë rajonale.
“Ne ndajmë shqetësime të mëdha në lidhje me reagimet përshkallëzuese të DPRK-së, veprimet destabilizuese”, tha ajo, duke iu referuar Koresë së Veriut me akronimin e emrit të saj zyrtar, Republika Popullore Demokratike e Koresë.
Tensionet në Gadishullin Korean kanë qenë të larta muajt e fundit, me Korenë e Veriut që lëshon balona plehrash drejt Koresë së Jugut dhe vazhdon testet e armëve.
© SYRI.net