SHBA, Britania e Madhe dhe Kanadaja kanë lëshuar paralajmërime sigurie për qytetarët e tyre në Nigeri, përpara protestave të planifikuara për këtë javë për vështirësitë ekonomike dhe inflacionin rekord në vendin e Afrikës Perëndimore.
Ambasadat e tre vendeve në Abuja, publikuan këshilla të veçanta në faqet e tyre të internetit, duke shprehur shqetësimin për trazirat e mundshme gjatë demonstratave që priten në të gjithë Nigerinë nga e enjtja deri më 10 gusht.
Qeveria kanadeze paralajmëroi se protestat "mund të bëhen të dhunshme në çdo kohë" dhe këshilloi qytetarët e saj që të shmangin tubimet e mëdha, duke iu përmbajtur urdhrave të autoriteteve lokale.
“Protestat e kaluara janë kthyer në të dhunshme me pak paralajmërim. Tregoni kujdes kur udhëtoni,” kërkoi Ministria e Jashtme e Mbretërisë së Bashkuar.
Ambasada e SHBA-së gjithashtu këshilloi qytetarët amerikanë që të shmangin demonstratat dhe të "mbajnë identifikimin e duhur", mes një pranie të pritshme të shtuar të sigurisë.
Aktivistët në shtetin më të populluar të Afrikës kanë bërë thirrje për dhjetë ditë marshime mbarëkombëtare kundër "qeverisjes së keqe", të cilën ata e kanë fajësuar për krizën ekonomike të vendit.
Nigerianët po përballen me krizën më të keqe të kostos së jetesës në gati 30 vjet, pasi Presidenti Bola Tinubu hoqi një subvencion të diskutueshëm të karburanti, dhe njoftoi reforma të tjera kur mori detyrën në maj të vitit të kaluar. Norma e inflacionit në vend arriti në 34.19% në qershor, me inflacionin e ushqimeve mbi 40%, sipas Byrosë Kombëtare të Statistikave.
Javën e kaluar, Tinubu paralajmëroi rininë e vendit kundër protestave, duke i quajtur organizatorët, njerëz me "motive të liga...duke përfituar" nga problemet ekonomike.
Organizatorët e protestave të planifikuara thuhet se janë frymëzuar nga ngjarjet e fundit në Kenia, ku javë të tëra tubimesh vdekjeprurëse detyruan qeverinë të tërhiqte një faturë financiare që do të rriste taksat.
Ndërsa njohin të drejtën e qytetarëve për protestë paqësore, zyrtarët e zbatimit të ligjit në Abuja kanë paralajmëruar se demonstratat mund të nxisin dhunë.
Nigeria ka një histori të goditjeve të dhunshme ndaj protestuesve. Në tetor 2020, forcat e sigurisë shtypën brutalisht protestat kundër Skuadrës Speciale Anti-Grabitjes (SARS), një njësi famëkeqe e policisë e akuzuar për vrasje jashtëgjyqësore, që tashmë herë është shpërbërë.
© SYRI.net