Laburistët kanë akuzuar paraardhësit e tyre në qeveri për shpenzime të tepruara të buxhetit gjatë qeverisjes së tyre.  Shpenzimet publike të Mbretërisë së Bashkuar kanë kapur shifrën e  22 miliardë paundëve (28 miliardë dollarë) mbi buxhetin deri në këtë vit, për shkak të keqmenaxhimit financiar të konservatorëve, i tha parlamentit të hënën kancelarja e re e Thesarit, Rachel Reeves.

Reeves mori postin e shefit të financave, pasi laburistët arritën një fitore dërrmuese në zgjedhjet e përgjithshme në fillim të korrikut, duke i dhënë fund 14 viteve të sundimit të Partisë Konservatore.

Duke paralajmëruar nevojën për të marrë "vendime të vështira", kancelarja njoftoi një shkurtim të menjëhershëm prej 5.5 miliardë paund (7 miliardë dollarë), duke premtuar një ulje të mëtejshme të shpenzimeve prej 8.1 miliardë  paundë (10.4 miliardë dollarë) për vitin e ardhshëm financiar.

Reeves njoftoi gjithashtu rritje të pagave mbi inflacionin për punonjësit e sektorit publik, që kushtojnë rreth 9.1 miliardë paund (11.7 miliardë dollarë). Politikat konservatore kishin shkaktuar greva të punëtorëve në disa fusha të sektorit publik për vite me radhë.

Financat në Mbretërinë e Bashkuar janë më të këqijat që nga viti 1945, tha kancelarja.

 “Ata i shmangën vendimet e vështira. Ata vënë partinë para vendit. Rezerva shpenzoi më shumë se tre herë, vetëm tre muaj në vitin financiar, dhe ata nuk i thanë askujt, " tha Reeves në Dhomën e Komunave. “Shkalla e kësaj mbishpenzime nuk është e qëndrueshme. Të mos veprosh, thjesht nuk është një opsion,” shtoi ajo.

Paraardhësi konservator i Reeves, Jeremy Hunt, ka akuzuar kancelaren e re se ka hedhur bazat për thyerjen e premtimeve të saj parazgjedhore dhe rritjen e taksave.

 “Ushtrimi i sotëm nuk është ekonomik, është politik. Ajo dëshiron të fajësojë qeverinë e fundit konservatore për rritjen e taksave dhe anulimet e projekteve,  që ajo ka planifikuar gjatë gjithë kohës”, ka thënë Hunt.

Qeveria e re laburiste trashëgoi një ekonomi të Mbretërisë së Bashkuar me nivelin më të lartë të borxhit neto të sektorit publik që nga fillimi i viteve 1960. Raporti i borxhit neto të sektorit publik të vendit ndaj produktit të brendshëm bruto (PBB) u vlerësua në 99.5% në fund të qershorit, sipas  buletinit të Zyrës së Statistikave Kombëtare . PBB-ja pritet të rritet me 0.7% këtë vit, sipas përditësimit të perspektivës ekonomike të korrikut të Fondit Monetar Ndërkombëtar .