Dhjetëra mercenarë të grupit rus, Wagner, u vranë nga xhihadistët dhe rebelët gjatë fundjavës së kaluar në veri të Malit. Kjo është përshkruar nga një analist të hënën si goditja më e rëndë ndaj grupit rus ndër vite.
Ndërsa, së paku dy mercenarë të tjerë u morën peng. Së paku 50 luftëtarë të Wagnerit u vranë në një pritë të al-Qaidas në kufi me Algjerinë, tha Wassim Nasr, specialist dhe hulumtues i lartë në Qendrën Soufan. Ai tha se i ka numëruar trupat në një video pas sulmit.
Mercenarët ishin duke luftuar kryesisht kundër rebelëve tuareg përkrah ushtrisë së Malit, kur konvoi i tyre u detyrua të tërhiqej brenda territorit të xhihadistëve dhe ra në pritë në jug të Tinzaouaten, tha Nasr.
Wagneri konfirmoi në Telegram të hënën se disa luftëtarë të tij, si dhe trupa të Malit, u vranë në një betejë kundër qindra militantëve. Grupi mercenar nuk tregoi se sa luftëtarë të tij u vranë. Ushtria e Malit tha se i humbi dy ushtarë dhe se i vrau 20 rebelë.
Në një komunikatë në fundjavë, Al-Qaida tha se 50 luftëtarë të Wagnerit u vranë në sulmin e saj, i cili kishte për qëllim “hakmarrjen për masakrat e kryera në veri dhe në qendër” të Malit në betejën shumëvjeçare kundër ekstremistëve.
Rebelët taureg thanë se një numër i papërcaktuar i mercenarëve dhe ushtarëve të Malit u dorëzuan në duart e tyre. Associated Press nuk ishte në gjendje ta verifikonte menjëherë videon e përmendur nga Nasr.
“Kjo është shumë e rëndësishme, nuk ka ndodhur kurrë më parë në tokën afrikane dhe do t’i ndryshojë dinamikat”, tha Nasr. “Ata nuk do të dërgojnë më ekspedita të mëdha si këto në afërsi të kufirit me Algjerinë”, tha ai.
Rusia e ka shfrytëzuar prishjen e marrëdhënieve mes Perëndimit dhe vendeve të rajonit Sahel në Afrikën Perëndimore, për të dërguar luftëtarë dhe për ta shtrirë ndikimin e vet.
Wagneri ka qenë aktiv në Sahel – pjesën dërrmuese në jug të Shkretëtirës së Saharës – ku mercenarët përfitojnë nga pasuritë e rrëmbyera minerale në këmbim të shërbimeve të sigurisë.
Wagneri ka qenë i pranishëm në Mali prej fundit të vitit 2022, pas një grusht shteti ushtarak. Trupat franceze dhe paqeruajtësit ndërkombëtarë para puçit ndihmuan në luftimin e militantëve, të cilët për më shumë se një dekadë i kanë kërcënuar komunitetet në rajonet qendrore dhe veriore.
Njëkohësisht, Wagneri është akuzuar se ka ndihmuar në kryerjen e sulmeve me dronë, si pasojë e të cilave janë vrarë civilë. Wagneri ka pasur rreth 1.000 luftëtarë në Mali.
Prej se filluan ta ndihmojnë ushtrinë e Malit për ta rimarrë kontrollin në qytetin e rëndësishëm verior, Kidal, mercenarët e Wagnerit kanë shfaqur vetëbesim të tepruar dhe kanë punuar përtej kapacitetit të tyre, sipas analistit të pavarur, John Lechner.
“Humbjet e mëdha apo dështimet, i atribuohen kompanive ushtarake private, ndërsa fitore Ministrisë së Mbrojtjes [së Rusisë]”, tha ai./REL/
© SYRI.net