Vetëm 400 njerëz në orë lejohen të ecin në shtegun, i cili ishte i mbyllur për dymbëdhjetë vjet, duke shijuar pamje panoramike befasuese të Mesdheut.

‘Via dell'Amore’, ‘Shtegu i Dashurisë’ në zonën popullore të pushimeve të Cinque Terre në Liguria në Italinë veriore, është mbyllur që nga një rrëshqitje dheu më 2012. Në atë kohë, katër turistë australianë u plagosën. Nga nesër, e shtunë, pushuesit mund të ecin sërish përgjatë shtegut mes fshatrave Riomaggiore dhe Manarola dhe të shijojnë pamjet panoramike të Mesdheut që të lënë pa frymë. Megjithatë, vetëm 400 persona lejohen në orë.

Via dell'Amore 1,5 kilometra e gjatë është një shteg i gërmuar pjesërisht në shkëmbin e fortë dhe që ngrihet pjerrët mbi det. Është shëtitja më e njohur në Rivierën Liguriane.

Midway

Pas dy vite e gjysmë pune dhe kosto riparimi prej rreth 24 milionë eurosh, u ndërtua një tunel nën një pjesë të shtegut dhe shkëmbinjtë mbi shtegun u siguruan me rrjetë çeliku dhe bulonat. Kjo do të thotë që pushuesit dhe vendasit mund të çlodhen përsëri dhe të ecin në rrugën pa pengesa nga Riomaggiore në Manarola. Sipas legjendës, të rinjtë vendas të dy fshatrave dikur u takuan atje në gjysmë të rrugës për një takim romantik. Prandaj mori dhe emrin "Rruga e Dashurisë".

Gurët ishin ngjitur në mur me kunja deri në 20 metra të gjatë. Rrjeta e çelikut, e cila synon të thithë çdo lirim të mundshëm të shkëmbit, është e gjeneratës më moderne. Kalldrëmet tipike të shtegut u zëvendësuan me beton të bërë nga një material, që mund t'i rezistojë valëve të stuhisë. Kjo është ndërhyrja më radikale që shkaktoi diskutime në media pas daljes së fotove të para.

Via dell'Amore është një atraksion i Cinque Terre. Pesë fshatrat në këtë zonë të njohur pushimesh kanë një popullsi totale prej rreth 7,000 banorësh  dhe tërheqin vizitorë nga e gjithë bota, për shkak të ngjyrave të tyre të ndezura. Rajoni mbrohet si park kombëtar dhe në vitin 1997 Cinque Terre u shpall një sit i Trashëgimisë Botërore të UNESCO-s.