Bangladeshi zgjati shtetrrethimin sërish të dielën për të kontrolluar protestat e dhunshme të udhëhequra nga studentët që kanë vrarë të paktën 114 njerëz, ndërsa autoritetet përgatiten për një seancë dëgjimore në Gjykatën e Lartë më vonë gjatë ditës, për kuotat e punësimit në qeveri që ndezën zemërimin.

Ushtarët kanë patrulluar në rrugët e kryeqytetit Dhaka, në qendër të demonstratave që u shndërruan në përleshje midis protestuesve dhe forcave të sigurisë.

Shërbimet e internetit dhe mesazheve me tekst në Bangladesh janë pezulluar që nga e enjtja, duke paralizuar vendin, pasi policia goditi protestuesit që kundërshtuan ndalimin e tubimeve publike.

Një shtetrrethimi i urdhëruar vonë të premten është zgjatur deri në orën 3 pasdite të se dielës, deri pas seancës dëgjimore në Gjykatën e Lartë dhe do të vazhdojë për një "kohë të pasigurt" pas një pauze dy-orëshe për njerëzit për të mbledhur furnizime, njoftuan mediat lokale.

Universitetet dhe kolegjet gjithashtu janë mbyllur që nga e mërkura. Trazirat mbarëkombëtare shpërthyen pas zemërimit të studentëve kundër kuotave për punësimet në qeveri që përfshinin rezervimin e 30% për familjet e atyre, që luftuan për pavarësi nga Pakistani.

Qeveria e kryeministrit Sheikh Hasina kishte hequr sistemin e kuotave në vitin 2018, por një gjykatë e rivendosi atë muajin e kaluar. Gjykata e Lartë pezulloi vendimin pas një apeli të qeverisë dhe do të shqyrtojë çështjen të dielën, pasi ra dakord të çojë përpara një seancë të caktuar për më 7 gusht.

Demonstratat, më të mëdhatë që kur Hasina u rizgjodh për një mandat të katërt radhazi këtë vit, janë nxitur gjithashtu nga papunësia e lartë mes të rinjve, të cilët përbëjnë gati një të pestën e popullsisë .

Departamenti Amerikan i Shtetit ngriti të shtunën këshillimin e udhëtimit për Bangladeshin në nivelin e katërt, duke u kërkuar qytetarëve amerikanë që të mos udhëtojnë në vendin e Azisë Jugore.