Ministria e Jashtme egjiptiane ka paralajmëruar se Lindja e Mesme së shpejti mund të zhytet në kaos. Paralajmërimi vjen pas sulmit izraelit në  portin jemenas, ndërsa ministria tha se të gjitha forcat ndërkombëtare duhet të bëjnë përpjekje maksimale ‘për t'i dhënë fund luftës në Rripin e Gazës, i cili është burimi kryesor i tensioneve në Lindjen e Mesme në këtë pikë’.

Qeveria egjiptiane beson se sulmi i fundit i Izraelit në portin jemenas të Hudejdah ka përkeqësuar seriozisht tensionet në rajon, kështu që palët e interesuara duhet të përpiqen të parandalojnë që Lindja e Mesme të zhytet në kaos, tha ministria e jashtme egjiptiane në një deklaratë.

Sipas dokumentit, Ministria e Jashtme egjiptiane njoftoi se ‘po ndjek situatën me shqetësim të madh’. Ajo është "e bindur se të gjitha palët duhet të tregojnë përmbajtje" dhe kërkon "të parandalojmë që rajoni të zhytet në kaos".

Pak më parë, avionë të Forcave Ajrore izraelite sulmouan qytetin port të Jemenit, Hudaydah, që ndodhet në bregun e Detit të Kuq. Sulmi ajror la të paktën tre persona të vdekur dhe rreth 80 të plagosur. Sipas Al Masirah, Forca Ajrore izraelite shënjestroi tanket e naftës në port, si dhe termocentralin e qytetit. Përveç kësaj, sulmi ajror kishte në shënjestër, edhe ndërtesën e policisë ushtarake në pjesën veriore të Hudejdës. Një zjarr i fuqishëm ka rënë në port, i cili në këtë pikë mbetet i pashuar.

Televizioni Al Hadath raportoi se të paktën 12 avionë luftarakë izraelitë, përfshirë avionë luftarakë F-35, morën pjesë në sulm.

Në orët e para të 19 korrikut, një shpërthim u dëgjua në qendër të Tel Avivit. Shërbimi i shtypit i Forcave të Mbrojtjes të Izraelit (IDF) tha se shpërthimi ishte "shkaktuar nga rënia e një objektivi ajror dhe nuk u aktivizuan asnjë siren". Lëvizja rebele Ansar Allah (Houthi) e Jemenit mori përgjegjësinë për sulmin, duke thënë se përdori një dron të avancuar që mund të depërtojë në mbrojtjen ajrore.