Ish-presidenti i ShBA-së Bill Clinton dhe ish-Sekretarja e Shtetit Hillary Clinton, kanë inkurajuar privatisht donatorët në javët e fundit për të vazhduar mbështetjen financiare të fushatës së presidentit amerikan Joe Biden.

Kështu raportoi CNN, duke referuar dy burimeve që mediumi i quajti si të njohura.

Një nga burimet tha se Klintonët po zgjedhin të jenë “të respektueshëm ndaj vendimit të Bidenit”.

Megjithatë, burimi i dytë, i cili është i njohur me të menduarit e tyre dhe ka folur me çiftin ditët e fundit, këmbënguli se ajo që është më e sakta është se ata janë “të respektueshëm ndaj procesit”.

Sipas këtij burimi, Klintonët e kanë bërë të qartë në biseda private kohët e fundit se nuk ka rëndësi se çfarë thotë apo mendon dikush – nëse Bideni nuk largohet nga gara e vitit 2024 ose delegatët votojnë për dikë tjetër, ai është kandidati i supozuar i partisë.

Ky burim nuk pranoi të komentojë nëse Klintonët kanë shprehur një pikëpamje personale nëse ata besojnë se Bideni duhet të vazhdojë të kërkojë një mandat të dytë.

Që nga debati i CNN më 27 qershor, donatorët që janë shumë të pasur janë frenuar nga shkrimi i çeqeve mes shqetësimeve në rritje për kandidaturën e Bidenit, duke ngritur shqetësime serioze rreth asaj se sa kohë mund të vazhdojë fushata me fuqi të plotë nëse rrethanat nuk ndryshojnë.