Shtatë persona, përfshirë tre fëmijë dhe nënën e tyre, vdiqën të enjten në atë që autoritetet dyshojnë se ishte zjarrvënia, që shkatërroi një apartament të mbushur me njerëz në katin e shtatë në një ndërtesë në Nice, qyteti më i madh në Rivierën Franceze.

Kryeministri në detyrë Gabriel Attal, i cili udhëtoi për në zonë, u tha gazetarëve se hetimi po përparonte dhe se hetimet tregojnë se janë në kërkim të tre personave.

Zjarri filloi rreth orës 3 të mëngjesit të së enjtes dhe u përhap aq shpejt nëpër apartament sa që vetëm njerëzit që ishin afër dritareve mund të shpëtoheshin, tha për mediat, përfaqësuesi lokal i ministrisë së brendshme, Hugues Moutouh.

Zjarri ka vrarë një burrë, një adoleshent, dy gra dhe tre fëmijë, tha ai. Një nga viktimat u hodh përmes dritares së lidhur në një dyshek, shtoi më tej.

“Nëna e familjes shkoi për të marrë fëmijët e saj në një vend të sigurt pranë dritares dhe më pas u kthye në flakë për të marrë tre të vegjlit e saj dhe nuk u kthye më”, u tha ai gazetarëve.

Prokurori i qytetit, Damien Martinelli hapi një hetim për zjarrvënie të qëllimshme dhe me motive kriminale.

“Do të më duhet të jap më shumë elemente për hetimin më vonë, por po fillojmë me një zjarrvënie”, tha ai.

Kryebashkiaku i qytetit, Christian Estrosi, tha se njerëzit me kapuç u panë nga pamjet e kamerave të sigurisë në zonë.

Ndërtesa ndodhet në lagjen Moulins, një zonë me kulla të shkatërruara të banesave sociale, të ngjashme me shumë "banlieues" në Francë.