Shërbimi Sekret ukrainas ka njoftuar se ka kryer me sukses një sulm mbi bazën ruse, në afërsi të liqenit Donzulav në Krime.

Ata i sulmuan nga uji dhe ajri në një operacion të përbashkët me marinën ukrainase, që për objektiv kishin shkatërrimin e qendrës komanduese.

Madje goditën edhe depot e municionit si dhe objekte tjera, brenda të cilave ruanin makineri të ndryshme luftarake që i përdornin kundër ukrainasve.

Janë publikuar pamjet ku shihen dronët detarë të mbushur me eksploziv duke iu afruar bazës ruse, ku më pas aktivizohet lënda shpërthyese.

Nga distanca shihen shpërthimet e fuqishme që ndodhin si dhe zjarri që ndriçon qiellin në mes të natës.