Parlamenti izraelit ka miratuar një rezolutë që bën thirrje për refuzimin e shtetësisë palestineze.

Ata që votuan pro përfshinin partitë e koalicionit fetar të krahut të djathtë të udhëhequr nga kryeministri Benjamin Netanyahu, si dhe partinë opozitare të Benny Gantz, për të cilën sondazhet sugjerojnë se mund të bëhet partia më e fortë dhe të sigurojë më shumë vende në parlament në zgjedhjet e reja.

Deri gati gjashtë javë më parë, Gantz ishte anëtar i kabinetit të luftës tashmë të shpërbërë, së bashku me politikanë të tjerë të moderuar.

“Krijimi i një shteti palestinez në zemër të Tokës së Izraelit do të përbënte një rrezik ekzistencial për shtetin e Izraelit dhe qytetarët e tij, do të përjetësonte konfliktin izraelito-palestinez dhe do të destabilizonte rajonin”, thuhet në rezolutë.

“Do të jetë vetëm një çështje e shkurtër derisa Hamasi të marrë nën kontroll shtetin palestinez dhe ta kthejë atë në një bazë terroriste radikale islamike që operon në koordinim me boshtin e udhëhequr nga Irani për të eliminuar Shtetin e Izraelit”, sipas rezolutës.

Gjashtëdhjetë e tetë nga 120 ligjvënës votuan për rezolutën, me nëntë anëtarë të partive arabe që votuan kundër saj. Pjesa tjetër ose mungonte ose abstenuan, sipas informacionit të dhënë nga Knesset.