Një zyrtar i lartë i Hamasit tha të dielën se grupi islamik nuk është tërhequr nga bisedimet e armëpushimit me Izraelin pas sulmeve vdekjeprurëse të kësaj fundjave në Gaza, që ushtria izraelite tha se kishin shënjestruar liderin ushtarak të grupit Mohammed Deif.

Por Izzat El-Reshiq, një anëtar i zyrës politike të Hamasit, akuzoi Izraelin se po përpiqet të prishë përpjekjet e ndërmjetësve arabë dhe të Shteteve të Bashkuara për të arritur një marrëveshje armëpushimi duke rritur sulmet e tij në enklavë.

Sulmi i së shtunës në zonën Khan Younis të Gazës, në të cilën u vranë të paktën 90 palestinezë sipas autoriteteve lokale shëndetësore, i ka vënë në dyshim bisedimet për armëpushimin.

Ditët e fundit kishte pasur shenja gjithnjë e më shpresëdhënëse se mund të arrihet një marrëveshje për ndalimin e luftimeve dhe kthimin e pengjeve të mbajtura në Gaza.

Dy burime egjiptiane të sigurisë në bisedimet e armëpushimit në Doha dhe Kajro thanë të shtunën se kryeministri izraelit Benjamin Netanyahu pritej të mblidhte rrethin e tij të ngushtë të ministrave më vonë të dielën për të diskutuar mbi bisedimet.

Sulmi i së shtunës që kishte në shënjestër Deif vrau Rafa Salama, komandant i brigadës Khan Younis të Hamasit, tha ushtria izraelite të dielën, por nuk kishte asnjë konfirmim për fatin e Deif.