Qëllimi i Google për të reduktuar gjurmët klimatike është në rrezik pasi mbështetet në gjithnjë e më shumë qendra të dhënash “të uritura” për energji për të fuqizuar produktet e reja me Al.

Gjiganti i teknologjisë zbuloi së fundmi se emetimet e tij të gazit serrë janë rritur me 48 për qind gjatë pesë viteve të fundit.

Google tha se konsumi i energjisë elektrike nga qendrat e të dhënave dhe emetimet e zinxhirit të furnizimit ishin shkaku kryesor i rritjes.

Gjithashtu, kompania zbuloi në raportin vjetor mjedisor se emetimet në vitin 2023 ishin rritur për 13 për qind, krahasuar me vitin e kaluar, duke arritur në 14.3 milionë tonë metrikë, shkruan the Guardian.

Kompania e teknologjisë, e cila ka investuar në mënyrë të konsiderueshme në AI, tha se qëllimi i saj “jashtëzakonisht ambicioz” për të arritur emetimet neto zero deri në vitin 2030 “nuk do të jetë i lehtë”.

Kjo pasi “pasiguria” rreth arritjes së objektivit përfshin “pasigurinë rreth ndikimit të ardhshëm mjedisor të AI, i cili është kompleks dhe i vështirë për t’u parashikuar”.

Bëhet e ditur se emetimet e Google janë rritur me gati 50 për qind që nga viti 2019, viti bazë për qëllimin e Google për të arritur zero neto.

Agjencia Ndërkombëtare e Energjisë vlerëson se konsumi total i energjisë elektrike i qendrave të të dhënave mund të dyfishohet nga nivelet e vitit 2022 në 1000 TWh në vitin 2026.

Qendrat e të dhënave luajnë një rol vendimtar në trajnimin dhe funksionimin e modeleve që mbështesin AI si Gemini i Google dhe GPT-4 i OpenAI, i cili fuqizon chatbotin ChatGPT.

Microsoft pranoi këtë vit se përdorimi i energjisë në lidhje me qendrat e tij të të dhënave po rrezikonte objektivin e tij “moonshot” për të qenë negativ i karbonit deri në vitin 2030.

Ndërkohë, bashkëthemeluesi i Microsoft, Bill Gates, tha se AI do të ndihmojë në luftimin e krizës klimatike, sepse teknologjia e madhe është “seriozisht e gatshme” të paguajë ekstra për të përdorur burime të pastra të energjisë elektrike në mënyrë që “të thotë se po përdorin energjinë e gjelbër”.