Uragani Beryl ka arritur në ishullin Carriacou në Grenada, sipas Qendrës Kombëtare të Uraganeve të SHBA (NHC) dhe një paralajmërim është gjithashtu në fuqi në ishujt tjerë të Karaibeve, Barbados, Shën Vincent dhe Grenadine dhe Tobago.

Uragani, i cili ka rifituar fuqinë në orët e fundit, ka shkaktuar paralajmërime për erëra kërcënuese për jetën dhe stuhi të rrezikshme. Aeroportet dhe bizneset u mbyllën dhe banorëve anembanë Karaibeve iu kërkua të kërkonin strehim pasi stuhia potencialisht shkatërruese goditi rajonin.

Dhjetëra fluturime u anuluan në rajon ndërsa Beryl u afrua të dielën mbrëma, ndërsa udhëheqësit i kërkuan publikut që të merrte parasysh paralajmërimet.

Uragani u ngrit në kategorinë katër të hënën. NHC paralajmëroi se pjesë të ishujve Windward duhet të përgatiten për "dëmtime potencialisht katastrofike nga era" dhe se Shën Vincenti, Grenadinet dhe Grenada ishin në rrezikun më të lartë të dëmtimit.

Meteorologët thonë se është e pazakontë që një uragan i kësaj force të formohet në fillim të vitit.

"Vetëm pesë uragane të mëdha (kategoria 3+) janë regjistruar në Atlantik përpara javës së parë të korrikut. Beryl do të ishte i gjashti dhe më i hershmi në këtë lindje të largët në Atlantikun tropikal," ka shkruar eksperti i uraganeve Michael Lowry në X.

Administrata Kombëtare Oqeanike dhe Atmosferike e SHBA (NOAA) ka paralajmëruar se Atlantiku i Veriut mund të ketë deri në shtatë uragane të mëdha këtë vit - nga mesatarja tri në një sezon. /BBCNews