Policia boliviane ka arrestuar liderin e një tentative për grusht shteti, disa orë pasi pallati presidencial në kryeqytetin La Paz u sulmua nga ushtarët.

Mjetet e blinduara dhe trupat kishin zënë pozicion në sheshin Murillo ku ndodhen ndërtesat kryesore qeveritare. Të gjithë më vonë u tërhoqën.

Udhëheqësi ushtarak i kryengritësve, gjenerali Juan José Zúñiga, kishte thënë se donte të "ristrukturonte demokracinë" dhe se ndërkohë që ai e respektonte Presidentin Luis Arce për momentin, do të kishte një ndryshim të qeverisë.

Gjenerali (në foto) tani është i arrestuar.

Presidenti Arce e dënoi përpjekjen për grusht shteti, duke i bërë thirrje publikut të "organizohet dhe të mobilizohet... në favor të demokracisë".

"Ne nuk mund të lejojmë përsëri përpjekjet për grusht shteti për të marrë jetë bolivianësh," tha ai në një mesazh televiziv drejtuar vendit nga brenda pallatit presidencial.

Fjalët e presidentit (në foto) rezonuan qartë, me demonstruesit pro-demokracisë që dolën në rrugë në mbështetje të qeverisë.

Arce gjithashtu njoftoi se po emëronte komandantët e rinj ushtarakë, duke konfirmuar raportet se gjenerali Zúñiga ishte shkarkuar pasi kritikoi hapur ish-udhëheqësin e Bolivisë, Evo Morales.

Morales dënoi gjithashtu tentativën e grushtit të shtetit dhe bëri thirrje që të ngrihen akuza penale kundër gjeneralit Zúñiga dhe "bashkëpunëtorëve" të tij.

Prokuroria publike ka hapur një hetim penal.

Në skenat dramatike të transmetuara në televizionin bolivian, presidenti Arce mund të shihet duke u përballur me ish-shefin e ushtrisë, gjeneralin Juan José Zuniga, i cili drejtonte përpjekjen për grusht shteti, në momentin kur ai hyri në korridorin e pallatit presidencial.

"Unë jam kapiteni juaj dhe ju urdhëroj të tërhiqni ushtarët tuaj dhe nuk do ta lejoj këtë mosbindje," i tha presidenti Arce, Zuniga-s, sipas Associated Press.

Zuniga, i cili u shkarkua si komandant i ushtrisë boliviane vetëm një ditë më parë, u arrestua më vonë dhe u pa duke u futur me forcë në një automjet policie, sipas mediave lokale. Vendndodhja e tij aktuale nuk dihet.

Gjenerali rebel u zotua të "rivendosë demokracinë"

Para ndalimit të tij, ish-shefi i ushtrisë Zuniga iu drejtua gazetarëve në shesh të mërkurën, i rrethuar nga ushtarë, duke thënë: "Ne duam të rivendosim demokracinë", ndërsa ai foli për problemet ekonomike të vendit. Ai ishte shkarkuar më parë për shkak të kërcënimit për të bllokuar një ofertë të Morales për rizgjedhje.

“Populli nuk ka të ardhme dhe ushtria ka guximin të kujdeset për të ardhmen e fëmijëve tanë, mirëqenien dhe përparimin e popullit tonë,” tha ai.

Ai u zotua "të lirojë të gjithë të burgosurit politikë", përfshirë ish-presidenten Jeanine Anez, aktualisht e burgosur për atë që gjykatat thanë se ishte roli i saj në protestat vdekjeprurëse që shpërthyen pas ngjitjes së saj në pushtet në 2019.

Bolivia ka një histori të gjatë paqëndrueshmërie politike, duke përfshirë grushtet e shtetit, dhe tentativa e dështuar vjen pasi vendi pa dalje në det të Amerikës së Jugut me rreth 12 milionë banorë lufton me një krizë ekonomike spirale që ka shkaktuar protesta.

Ushtarët bllokuan rrugën përpara pallatit presidencial, djathtas, dhe Asamblesë Legjislative, majtas, në Plaza Murillo në La Paz, Bolivi, më 26 qershor 2024. 

Dënim ndërkombëtar

Zyra e Prokurorit të Përgjithshëm të Bolivisë nisi një hetim penal kundër Zuniga-s më vonë të mërkurën, me Zyrën e Prokurorit duke thënë në X se "të gjithë pjesëmarrësit e tjerë" të përfshirë në ngjarjet e së mërkurës në La Paz do të hetohen gjithashtu.

Zyra e Prokurorit të Përgjithshëm tha se do të bëjë "të gjitha përpjekjet e nevojshme" për të identifikuar të gjithë personat e përfshirë dhe për të hetuar më tej tentativën për grusht shteti dhe për të vendosur "dënimin maksimal për ata që janë përgjegjës".

Fredy Mamani, ish-zëvendësministër i jashtëm i Bolivisë dhe aleat i Morales dhe Arce, i tha CNN se pavarësisht natyrës "jodemokratike" të "tankeve, ushtarëve me uniformë dhe marrjes së sheshit... është thelbësore të theksohet se populli bolivian është i bashkuar përballës çdo grushti shteti”.

Lajmi për tentativën për grusht shteti u dënua nga liderët ndërkombëtarë dhe rajonalë, duke përfshirë presidentin e Paraguait Santiago Peña, presidentin e Meksikës dhe Bashkimin Evropian.