Zyrtarët nga të dyja palët më në fund ranë dakord të zhvillojnë konsultime, duke sinjalizuar se mund të bëhet përparim në gjetjen e një mënyre për t'i dhënë fund sherrit për subvencionet.

Kina dhe BE kanë rënë dakord të zhvillojnë bisedime mbi tarifat e propozuara që do të godasin automjetet elektrike të prodhimit kinez në tregun evropian.

Njoftimi erdhi pas një telefonate të shtunën midis komisionerit të BE, Valdis Dombrovskis dhe ministrit kinez të Tregtisë Ëang Ëentao.

“Kjo është gjë e re dhe befasuese pasi nuk ka qenë e mundur të hyjmë në një kalendar konkret të negociatave javët e fundit”, tha Zv.kancelari dhe ministri i Gjermanisë për Çështjet Ekonomike dhe Veprimin për Klimën, Robert Habeck.

Në kohën e përparimit, Habeck ishte në një vizitë diplomatike tre-ditore në Kinë.

"Jemi larg fundit, por, të paktën, është një hap i parë që nuk ishte i mundur më parë," shtoi ai.

Habeck është zyrtari i parë i lartë evropian që bën një udhëtim në Kinë që kur Brukseli vendosi të vendosë tarifa për automjetet elektrike kineze, që mund të arrijnë 48% të vlerës totale të mallrave.

Masa u njoftua këtë muaj si rezultat i një hetimi të nisur vitin e kaluar nga Komisioni Evropian.

Hetimi kërkoi të përcaktonte nëse konkurrentët evropianë po dëmtoheshin nga subvencionet kineze, të cilat i bënin  prodhuesit t’i mbanin kostot e tyre artificialisht të ulëta.
Kina i ka hedhur poshtë pretendimet, duke argumentuar se industria e saj ka lulëzuar natyrshëm.

Zhvillimi kinez "është rezultat i konkurrencës më shumë se i subvencioneve, e lëre më konkurrencës së pandershme", tha Zheng Shanjie, kryetar i Komisionit Kombëtar të Zhvillimit dhe Reformës së Kinës, gjatë një takimi me Habeck të Gjermanisë.

Tarifat për automjetet elektrike do të zbatohen nga 4 korriku, megjithëse tarifat përfundimtare do të vendosen në nëntor. Këto zakonisht zgjasin për pesë vjet.

Forma të tjera të teknologjisë së gjelbër kineze, të tilla si panelet diellore dhe turbinat me erë, janë vënë në shënjestër gjithashtu nga Komisioni.

Gjatë një dialogu për klimën dhe transformimin gjatë fundjavës, Habeck tha se "këto nuk janë tarifa ndëshkuese", por përkundrazi se ato ishin masa korrigjuese që synonin të rregullonin fushën e lojës tregtare.

Krahasuar me lojtarët e tjerë evropianë, Gjermania është dëshmuar të jetë më ngurruese për të imponuar politika proteksioniste ndaj Kinës.

Një arsye për këtë është se industria gjermane e prodhimit të makinave është shumë e varur nga tregu kinez.

“Ne duam të shesim makinat tona në Evropë, në Amerikën e Veriut, në Japoni, në Kinë, në Afrikë, në Amerikën e Jugut, në të gjitha vendet”, tha kancelari Olaf Scholz vitin e kaluar. "Por kjo do të thotë se ne jemi të hapur për të futur makinat e vendeve të tjera edhe në tregun e Gjermanisë."