Beograd, 20 qershor  - Njerëzit, që të përballonin temperaturat përvëluese të enjten, kërkuan lehtësim në liqenin Ada Ciganlija të Beogradit, nëpër shatërvanë dhe kafene, ndërkohë që qeveria serbe i urdhëroi punëdhënësit të mbrojnë punëtorët që punojnë jashtë nga vala e të nxehtit.

Meteorologët parashikojnë temperatura rreth 40 gradë Celsius në të gjithë Serbinë këtë javë pasi erërat nga Afrika e Veriut po sjellin një front të nxehtë dhe të thatë në të gjithë Ballkanin, njofton Reuters.

Autoritetet shëndetësore dhe meteorologët shpallën alarm moti "të kuq" dhe i këshilluan njerëzit të mos dilnin jashtë.

 Shërbimi i urgjencës i Beogradit tha se mjekët ndërhynë më shumë se 100 herë gjatë natës, kryesisht duke trajtuar njerëz me sëmundje të zemrës dhe kronike.

Ministria serbe e Punës dhe Punësimit u tha punëdhënësve që të organizojnë punën në natyrë në mënyrë të tillë që të shmanget puna e rëndë fizike dhe ekspozimi i drejtpërdrejtë në diell.

"Unë besoj se kjo është e gjitha për shkak të ndryshimeve klimatike që shkaktojnë temperatura të tilla," tha studenti 23-vjeçar Vojislav Sumenkovic.

Në Malin e Zi, vendin fqinj, ku autoritetet shëndetësore gjithashtu paralajmëruan njerëzit që të strehoheshin nga dielli deri në orët e vona të pasdites, dhjetëra mijëra turistë u dyndën në plazhet e Adriatikut, duke përfshirë vendpushimin Ada Bojana në kufi me Shqipërinë.

"Vapa është një lloj sfide, por ne jemi në ujë, në plazh," tha Kolya, 35 vjeç, një turist nga Gjermania.

Në Greqi të mërkurën, zjarrfikësit luftuan me zjarret në afërsi të Athinës që i  detyruan dhjetëra të largoheshin nga shtëpitë e tyre dhe autoritetet thanë se besonin se flakët ishin rezultat i zjarrvënieve si dhe kushteve të nxehta dhe të thata.