Kryeministri Gabriel Attal e quajti sulmin ndaj një vajze të vogël “absolutisht të neveritshëm, të padurueshëm dhe të papërshkrueshëm”.

Franca është tronditur nga lajmi se tre djem të moshës 12 deri në 13 vjeç janë arrestuar në lidhje me përdhunimin e një vajze 12-vjeçare, që sipas policisë ishte një akt dhune antisemitike.

Ngjarja ka ndodhur në një periferi të Parisit. Sipas denoncimit të viktimës, ajo i është nënshtruar abuzimit verbal, duke përfshirë edhe atë që sulmuesit e saj e kanë quajtur “çifute e pistë”. Ajo raportoi se ishte sulmuar fizikisht, duke përfshirë edhe shkelmimin, shuplakat dhe shkuljen e flokëve.

Më tej ajo pretendoi se ishte përdhunuar disa herë nga dy nga tre adoleshentët dhe se njëri nga të tre e kërcënoi se do ta digjte.

Dy nga të akuzuarit janë dërguar në mbajtje dhe janë ngritur kallëzime paraprake, ndërsa i treti është nën statusin e dëshmitarit të asistuar.

Më vonë, avokati dhe udhëheqësi hebre Elie Korchia tha në një intervistë me transmetuesin francez BFM se vajza është hebreje dhe se Palestina u përmend gjatë sulmit.

Flasin liderët

Kryeministri francez Gabriel Attal shkroi në X, dikur në Twitter, se vajza ishte "përdhunuar sepse ishte hebreje".

Gjatë një interviste me kanalin televiziv francez TF1 të mërkurën në mbrëmje, Attal u kërkoi udhëheqësve të partive politike të shmangin përkeqësimin e një situate tashmë kritike lidhur me antisemitizmin në Francë.

"U bëj thirrje të gjithë liderëve politikë që të ngrenë barriera rreth çështjes së antisemitizmit. Mjaft me retorika që banalizojnë, mjaft me komente që tolerohen, që krijojnë një klimë në vend që është vdekjeprurëse. Fatkeqësisht, që nga 7 tetori, antisemitizmi ka ardhur sërish në rritje në vendin tonë”.

Ai e quajti incidentin "absolutisht të neveritshëm, të padurueshëm dhe të papërshkrueshëm".

Sulmi vjen në mes të fushatës për zgjedhjet e parakohshme legjislative dhe liderët e partive të ndryshme reaguan shpejt – veçanërisht e majta ekstreme dhe e djathta ekstreme.

Jean-Luc Mélenchon, kreu i partisë së majtë La France Insoumise, postoi në platformën e mediave sociale X: “Të tmerruar nga ky përdhunim në Courbevoie dhe gjithçka që ai thekson në lidhje me kushtëzimin e sjelljes kriminale mashkullore që në moshë të re dhe racizmin antisemitik.

"Solidaritet dhe ngushëllime viktimës dhe të afërmve të saj. Shpresoj që kujdesi dhe mbështetja emergjente të bëhet siç duhet. Dhe ky krim dhe vuajtja që shkakton të mos kthehet në spektakël mediatik".

Marine Le Pen, e cila kryeson grupin e Tubimit Kombëtar të ekstremit të djathtë në Asamblenë Kombëtare, hyri në X për të dënuar sulmin ndërsa kritikoi gjithashtu të majtën ekstreme, duke e akuzuar se po e shfrytëzon konfliktin Izrael-Hamas për përfitime politike.

“Sulmi i fundit antisemitik dhe përdhunimi i një 12-vjeçareje në Hauts-de-Seine janë të neveritshme”, shkroi ajo. “Rritja e incidenteve antisemitike, me 300% në krahasim me tre muajt e parë të vitit 2023, duhet të shërbejë si një thirrje zgjimi për të gjithë qytetarët francezë.

"Përdorimi si kokë turku nga e majta ekstreme i hebrenjve mbi konfliktin izraelito-palestinez është një kërcënim i vërtetë për harmoninë shoqërore. Të gjithë duhet ta dinë këtë ndërsa i afrohemi 30 qershorit dhe 7 korrikut."