Kylian Mbappe konfirmoi të dielën se nuk do të luajë për ekipin olimpik të Francës në Lojërat e Parisit pasi klubi i tij i ri Real Madrid është kundër kësaj ideje.

25-vjeçari tha në mars se ai dëshironte të luante në Lojërat e tij në atdhe, por duke qenë se turneu olimpik i futbollit nuk është në kalendarin e FIFA-s, klubet nuk janë të detyruara t’i lëshojnë lojtarët e tyre, njofton Reuters.

Mbappe nuk u përfshi në skuadrën paraprake prej 25 lojtarësh për Olimpiadën në fillim të këtij muaji, megjithëse trajneri Thierry Henry e la derën hapur.

“Pozicioni i klubit tim ishte shumë i qartë, kështu që nga ai moment, mendoj se (e dija) që  nuk do të merrja pjesë në lojëra”, u tha Mbappe gazetarëve përpara ndeshjes së të hënës në Grupin D kundër Austrisë në Euro 2024.

"Kështu është, dhe unë e kuptoj këtë. Unë do t'i bashkohem një ekipi të ri në shtator, kështu që nuk është mënyra më e mirë për të filluar një aventurë.

"Unë do t'i uroj kësaj skuadre franceze gjithë të mirat. Do të shikoj çdo ndeshje. Shpresoj që ata të fitojnë medaljen e artë."/ar.sh/SYRI.NET