Mijëra gra protestuan të shtunën kundër një projektligji që do të barazonte abortet pas 22 javësh shtatzënie me vrasje dhe do të vendoste dënime nga gjashtë deri në 20 vjet burg.

Demonstruesit marshuan përgjatë rrugës kryesore Paulista të Sao Paulos duke mbajtur pankarta që refuzonin propozimin, të cilin ata e quajnë qasjen më represive ndaj të drejtave riprodhuese të grave në dekada.

Njerëz të të gjitha moshave, duke përfshirë shumë pensionistë dhe fëmijë, mbushën rrugët duke brohoritur: “Fëmija nuk është nënë, përdhunuesi nuk është baba”.

Aborti në Brazil lejohet vetëm në rastet e përdhunimit, deformimit të fetusit ose kur jeta e nënës është në rrezik. Nëse ligji i mbështetur nga ligjvënësit ungjillorë bëhet ligj, abortet nga viktimat e përdhunimit do të konsiderohen si vrasje pas 22 javësh të shtatzënisë.

Grupet feministe kritikuan legjislacionin e propozuar për vendosjen e dënimeve më të ashpra se ato që u jepen përdhunuesve në Brazil./