Drejtuesit e vendeve të G7 përfunduan takimin e nivelit të lartë me paralajmërimin më të fortë të bërë deri më tani Kinës, duke deklaruar se mbështetja nga Pekini për bazën e industrisë ushtarake të Moskës “po i mundëson Rusisë të vazhdojë me luftën e saj të paligjshme në Ukrainë”.

Udhëheqësit e G7 ranë gjithashtu dakord me propozimin e presidentit amerikan, Joe Biden, për t’i ofruar Kievit dhjetëra miliarda dollarë kredi, që do të shlyhen nga interesat e krijuara nga asetet e ngrira të Rusisë që gjenden në institucionet financiare perëndimore.

Kryeministrja italiane, njëkohësisht organizatore e takimit të nivelit të lartë, Giorgia Meloni, tha se “kemi arritur një marrëveshje politike për të ofruar 50 miliardë dollarë mbështetje të mëtejshme financiare për Ukrainën deri në fund të vitit”.

Udhëheqësit e vendeve demokratike më të pasura të botës thanë se janë “të angazhuar për t’ia shtuar Rusisë kostot e luftës”, duke kërcënuar me vendosjen e sanksioneve të mëtejshme ndaj atyre që ndihmojnë Moskën në shmangien e sanksioneve, përcjell Telegrafi.

Bëhet e ditur se paralajmërimi ndaj Kinës gjendet në deklaratën e përbashkët të qarkulluar nga udhëheqësit, ndërsa po përfundonte dita e dytë e takimit të nivelit të lartë në Apulia, të Italisë. Komunikata përmban gjuhën më të fortë të përdorur deri më tani ndaj Pekinit, duke reflektuar kështu zhgënjimin e presidentit Biden me rolin që po luan Kina në fuqizimin e makinerisë së luftës së Rusisë.

“Pekini po i ofron Rusisë teknologjinë për të prodhuar armë”, tha presidenti Biden gjatë konferencës së përbashkët për shtyp me presidentin ukrainas, Volodymyr Zelensky.

“Pra, po ndihmon në fakt Rusinë”, shtoi ai.

Udhëheqësit e G7 vunë në dukje edhe rrezikun që paraqet Kina për sigurinë e ekonomisë globale, përfshirë mbiprodhimin e veturave elektrike dhe praktikat e tregtisë dhe investimeve në vendet në zhvillim.

Bashkimi Evropian njoftoi një rritje të tarifave deri në 38 për qind për importet e automjeteve elektrike kineze, mes hetimeve nëse prodhuesit kinezë të automjeteve po mbingarkojnë tregjet evropiane me automjete elektrike më pak të shtrenjta, të subvencionuara nga qeveria.

Pekini tha se “do të marrë të gjitha masat e nevojshme” për të mbrojtur interesat e tij, por nuk u kundërpërgjigj ndaj BE-së.

Ndryshe, në fillim të këtij viti, SHBA-ja katërfishoi tarifat për automjetet elektrike kineze.

“Me kalimin e kohës, është më e qartë se ambicia e presidentit kinez Xi Jinping është të rivendosë dominimin e Kinës të paktën në rajonin Indo-Paqësor, ndoshta edhe më gjerë. Dhe kjo po zhvillohet kryesisht nëpërmjet një përpjekjeje për të vendosur dominim ekonomik dhe teknologjik”, tha një zyrtar i lartë i administratës së presidentit Biden në kushte anonimiteti.

“Mbështetja e Pekinit për Rusinë mund të përbëjë një kërcënim afatgjatë për sigurinë e Evropës”, paralajmëroi zyrtari amerikan.

Ndërkohë SHBA-ja njoftoi sanksione dytësore ndaj entiteteve që ndihmojnë Moskën, përfshirë kompanitë me seli në Kinë që shesin gjysmëpërçues në Rusi dhe banka më të vogla kineze me lidhje me institucionet financiare ruse ndaj të cilave janë vendosur më herët sanksione.

Udhëheqësit riafirmuan gjithashtu mbështetjen për propozimin e fundit të armëpushimit në Gazë. Presidenti Biden tha se nuk ishte i bindur se do të arrihej së shpejti një pauzë në luftime dhe se Hamasi ishte përgjegjës për vonesën.

“Kam paraqitur një propozim që është miratuar nga Këshilli i Sigurimit i OKB-së, nga G7, nga izraelitët, dhe pengesa më e madhe deri më tani është refuzimi i Hamasit për të nënshkruar, edhe pse kanë paraqitur diçka të ngjashme”, tha ai.