Shtetet e Bashkuara kanë urdhëruar evakuimin e pjesshëm të ambasadës së tyre në Niger pas grushtit të shtetit të javës së kaluar.

Qindra shtetas të huaj tashmë janë evakuuar nga vendi dhe të dielën ambasada franceze u sulmua nga protestuesit.

Udhëheqësi i grushtit të shtetit, gjenerali Abdourahamane Tchiani ka paralajmëruar kundër "çdo ndërhyrje në punët e brendshme" të vendit.

Nigeri është një prodhues i rëndësishëm i uraniumit dhe shtrihet në një rrugë kryesore migrimi drejt Afrikës së Veriut dhe Mesdheut.

Sekretari amerikan i Shtetit Antony Blinken foli me presidentin e rrëzuar, Mohamed Bazoum, të mërkurën, thotë departamenti i shtetit, duke shtuar se SHBA-të janë të përkushtuara për rivendosjen e qeverisë së zgjedhur në mënyrë demokratike të Nigerit.

Zëdhënësi Matthew Miller tha se, pavarësisht evakuimit të pjesshëm, ambasada e vendit në kryeqytetin Niamey do të mbetet e hapur.

"Ne mbetemi të përkushtuar ndaj popullit të Nigerit dhe marrëdhënieve tona me popullin e Nigerit dhe mbetemi të angazhuar diplomatikisht në nivelet më të larta," tha ai.

SHBA është një donator i madh i ndihmës humanitare dhe të sigurisë për Nigerin dhe ka paralajmëruar më parë se grushti mund të çojë në pezullimin e të gjithë bashkëpunimit.

Franca, ish-fuqia koloniale në Niger dhe BE-ja tashmë kanë pezulluar ndihmën financiare dhe të zhvillimit.

Komuniteti Ekonomik i Shteteve të Afrikës Perëndimore (Ecowas), një bllok tregtar i 15 vendeve të Afrikës Perëndimore, ka vendosur sanksione të cilat përfshijnë ndalimin e të gjitha transaksioneve tregtare me Nigerin dhe ngrirjen e aseteve të vendit në bankën qendrore rajonale.

Në një fjalim televiziv të mërkurën, gjenerali Tchiani tha se regjimi i ri i hodhi poshtë "këto sanksione në tërësi dhe refuzon të dorëzohet ndaj çdo kërcënimi, ngado që ai vjen".

Ai i etiketoi sanksionet "cinike dhe të padrejta" dhe tha se ato synonin të "poshtëronin" forcat e sigurisë të Nigerit dhe ta bënin vendin "të paqeverisshëm".

Shefat ushtarakë nga Ecowas u takuan gjithashtu në Nigeri të mërkurën për të diskutuar një ndërhyrje të mundshme ushtarake, megjithëse ata thanë se një veprim i tillë do të ishte "zgjidhja e fundit".

Gjenerali Tchiani, një ish-shefi i gardës presidenciale të Bazoum, mori pushtetin më 26 korrik, duke thënë se donte të shmangte "vdekjen graduale dhe të pashmangshme" të Nigerit.