Zgjedhjet e Brazilit po shkojnë drejt një raundi të dytë në të cilin kandidati i krahut të majtë, Luiz Inácio Lula da Silva, do të përballet me presidentin aktual të ekstremit të djathtë, Jair Bolsonaro.

Me pothuajse të gjitha votat e numëruara, Lula kishte fituar 48% kundrejt 43% të Bolsonaros - një rezultat shumë më i ngushtë se sa kishin parashikuar sondazhet.

Por Lula nuk arriti më shumë se 50% të votave të vlefshme të nevojshme për të parandaluar balotazhin.

Votuesit tani kanë katër javë kohë për të vendosur se cili nga të dy duhet të udhëheqë Brazilin.

Fitorja e plotë në raundin e parë do të ishte nga ato që rrallë ndodhin për çdo kandidat - hera e fundit që ndodhi ishte 24 vjet më parë.

Por Presidenti Bolsonaro dhe Lula u kishin dhënë mbështetësve të tyre shpresë se ata mund të arrinin pikërisht këtë.

Megjithatë, të dy kandidatët mund dhe do ta pretendojnë këtë si fitore.

Për Lulën - i cili nuk mundi të kandidonte në zgjedhjet e 2018 sepse ishte në burg, i dënuar me akuza korrupsioni - kjo paraqet një rikthim të jashtëzakonshëm.

Dhe Presidenti Bolsonaro, për të cilin anketimet kishin treguar se ishte shumë pas Lulës, gëzohet për faktin se tregoi se anketuesit e kishin gabim.

Kjo është një dramë që ka vite që po krijohet. Dy kandidatët janë rivalë të mëdhenj dhe e shpenzuan pjesën më të madhe të fushatës për fyerje.

Në debatin e fundit televiziv para votimit, Presidenti Bolsonaro e quajti Lulën një hajdut, në lidhje me akuzat për korrupsion që e futën në burg për 580 ditë përpara se të anulohej dënimi.

Lula, nga ana tjetër, e ka etiketuar zotin Bolsonaro si të çmendur.

Nuk është për t'u habitur që ky tension është derdhur në rrugë. Gjatë netëve para votimit, njerëzit në Rio mund të dëgjoheshin duke bërtitur "Lula është një hajdut" dhe "Ik me Bolsonaron" me njëri-tjetrin.

Meqenëse të dy kandidatët janë në pole kaq të kundërta, shumë gjëra janë në rrezik.

Lula thotë se do të forcojë masat për të mbrojtur pyllin tropikal të Amazonës, kurse zoti Bolsonaro ka argumentuar se pjesë të pyllit tropikal duhet të hapen për shfrytëzim ekonomik.

Shpyllëzimi dhe zjarret në pyje janë rritur gjatë kohës së Presidentit Bolsonaro në detyrë. Aktivistët e klimës kanë paralajmëruar se nëse ai rizgjidhet, zona mund të shkojë në një pike pa kthim.

Kritikët theksojnë se arritjet mjedisore të Lulës gjatë kohës së tij në detyrë – kur ai e qeverisi Brazilin nga viti 2003 deri në vitin 2010 - ishte shumë larg të qenit i përsosur.

Por me zotin Bolsonaro duke llogaritur sektorin bujqësor dhe agrobiznesin si vota dhe mbështetje, është Lula ai që është zgjedhja e preferuar e aktivistëve të klimës.

Mirëpo votuesit në Brazil kanë shumë shqetësime të tjera të ngutshme, si rritja e çmimeve të ushqimeve, të cilat kanë kontribuar në një rritje të varfërisë dhe urisë.

Shumë votues përmendën gjithashtu arsimin dhe nivelet e larta të pabarazisë në Brazil si çështje që duan të trajtojë presidenti i ri.

Megjithatë, pjesa më e madhe e fushatës u mbyt nga shqetësimi se Bolsonaro mund të mos e pranojë humbjen pasi kishte thënë se "vetëm Zoti" mund ta largonte atë nga detyra.

Ai kishte hedhur gjithashtu dyshime mbi sistemin elektronik të votimit të Brazilit, duke pretenduar - pa dhënë asnjë provë - për mashtrim.

Me rezultatin shumë më të favorshëm për të se sa ishte parashikuar, ai tani ka të ngjarë të përqendrohet më shumë se si të ndikojë ata votues që votuan për një nga nëntë kandidatët e tjerë që u eliminuan në raundin e parë.