Gjykata e Lartë e SHBA -së duket e gatshme të anulojë një vendim historik që legalizoi në mënyrë efektive abortet në të gjithë Amerikën, duke i dhënë autoritetin për të vendosur nëse do të lejohet apo jo procedura përsëri shteteve individuale.  

Një  draft- projekt i cili u publikua nga Politico, zbulon se shumica e nëntë gjyqtarëve të Gjykatës së Lartë në SHBA janë dakord mbi çështjen që do të mjaftonte për të detyruar një ndryshim në ligj - megjithëse vendimi i tyre nuk është përfundimtar derisa vendimi të publikohet zyrtarisht.

Në dokument, gjyqtari Samuel Alito shkruan se Roe v Wade - vendimi i Gjykatës së Lartë i vitit 1973, i cili konstatoi se rregullimi i tepërt shtetëror i abortit është jokushtetues - ishte "jashtëzakonisht i gabuar që në fillim" dhe "duhet anuluar".

Instituti Guttmacher, një grup kërkimor pro-zgjedhjes, ka thënë se 26 shtete janë 'të sigurta ose të mundshme' për të ndaluar abortin nëse Roe kundër Wade përmbyset. 

Alito, i cili u emërua në gjykatë në vitin 2006 nga George W Bush, argumenton se 'arsyetimi i Roe ishte jashtëzakonisht i dobët dhe vendimi ka pasur pasoja të dëmshme'. 

Politico shkruan se, përveç Alitos, katër gjyqtarë të tjerë kanë votuar në favor të përmbysjes së ligjit: Clarence Thomas, Neil Gorsuch, Brett Kavanaugh dhe Amy Coney Barrett, të cilët të gjithë u emëruan nga presidentët republikanë.

Nëse rrjedhja rezulton të jetë e vërtetë kjo do të shënonte herën e parë që një draft  është shfaqur në publik para se të publikohej zyrtarisht, një veprim që pritet brenda dy muajve të ardhshëm.

Një zëdhënës i Gjykatës së Lartë tha: 'Gjykata nuk ka koment.'

 Vetëm disa orë pasi ky draft u publikua, qindra aktivistë pro abortit u mblodhën para Gjykatës së Lartë të SHBA të hënën mbrëma.

Abby Korb, një studente e diplomuar 23-vjeçare dhe ndihmëse e Kongresit, tha se ajo ishte 'në shok të vërtetë' kur u publikua lajmi dhe u drejtua me shpejtësi në Gjykatën e Lartë me një mik.

"Unë jam një grua dhe të drejtat e mia më hiqen çdo ditë," tha ajo.

ÇFARË ËSHTË ROE V. WADE?

Vendimi Roe kundër Wade gati 50 vjet më parë pranoi se e drejta për privatësi personale sipas Kushtetutës së SHBA-së mbron aftësinë e një gruaje për të ndërprerë shtatzëninë.

Më 22 janar 1973, Gjykata e Lartë vendosi që e drejta kushtetuese për privatësi zbatohej dhe për abortin.

Roe ishte 'Jane Roe', një pseudonim për Norma McCorvey, një nënë beqare shtatzënë për herë të tretë, e cila kërkonte të abortonte.

Ajo paditi prokurorin e përgjithshëm të Dallasit, Henry Wade, për një ligj të Teksasit që e bënte krim ndërprerjen e shtatzënisë, përveç rasteve të përdhunimit ose incestit, ose kur jeta e nënës ishte në rrezik.

Avokatët e Roe thanë se ajo nuk ishte në gjendje të udhëtonte jashtë shtetit për të kryer një abort dhe argumentuan se ligji ishte shumë i paqartë dhe shkelte të drejtat e saj kushtetuese.

Një treshe e ankesave - nga një grua që donte një abort, një mjek që donte t'i kryente ato dhe një grua jo shtatzënë që donte të drejtën nëse lindte nevoja - përfundimisht arritën në gjykatën më të lartë të vendit.

Gjykata dëgjoi argumentet dhe më pas priti deri pas rizgjedhjes së presidentit republikan Richard Nixon, në nëntor 1972.

Vetëm janarin e 1973-it ajo ofroi vendimin e saj historik shtatë me dy - duke përmbysur ligjet e Teksasit dhe duke vendosur një precedent ligjor që ka pasur pasoja në të 50 shtetet.