Nga Justin McCurry, GUARDIAN

Presidenti ukrainas, Volodymyr Zelensky ka përshkruar se si forcat ruse ishin shumë afër kapjes peng apo vrasjes së tij në orët e para të pushtimit.

Zelensky është vlerësuar gjerësisht për përgjigjen e tij ndaj pushtimit gjatë 65 ditëve që kur trupat e para ruse hynë në Ukrainë. Ai ka mbajtur një fjalim drejtuar Kongresit Amerikan, Bankës Botërore dhe te Çmimet Grammy. Boris Johnson është ndër figurat e profilit të lartë që është i etur për t’u parë në shoqërinë e tij.

Por koha e tij si udhëheqës i një vendi nën sulm nga një fqinj shumë më i fuqishëm mund të kishte përfunduar brenda disa orësh nga fillimi i pushtimit.

Duke folur për revistën Time, reporteri i të cilës kaloi dy javë në kompleksin presidencial në Kiev, Zelensky përshkroi se si trupat ruse iu afruan gjetjes së tij dhe familjes, ndërsa ata u përpoqën që të vënë nën kontroll zonën qeveritare të kryeqytetit në ditën e parë të konfliktit.

Ndërsa shumë nga kujtimet për orët e para mbeten të fragmentuara, Zelensky thotë se agimi i 24 shkurtit binte në sy.

Pasi nisi bombardimi, ai dhe e shoqja, Olena Zelenska, shkuan t’i tregonin vajzës së tyre, 17-vjeçare, dhe djalit 9-vjeçar që të përgatiteshin të largoheshin nga shtëpia. “I zgjuam nga gjumi. Kishte zhurma të forta. Më tej po ndodhnin shpërthime”, thotë Zelensky.

Ushtria ukrainase i tha Zelensky-t se ekipet ruse të sulmit ishin ulur me parashutë në Kiev për ta vrarë ose për ta kapur atë dhe familjen e tij. “Para asaj nate, ne kishim parë gjëra të tilla vetëm në filma,” tha për revistën Andriy Yermak, shef i stafit të tij.

Përleshjet me armë shpërthyen rreth lagjes qeveritare, ndërsa ra nata në ditën e parë të luftës. “Rojet brenda kompleksit fikën dritat dhe sollën jelekët antiplumb dhe disa pushkë sulmi për presidentin Zelensky dhe një duzinë ndihmësish të tij,” kujton reporteri i Times.

Një nga zyrtarët e paktë që dinte të përdorte armët ishte Oleksiy Arestovych, një veteran i shërbimit të inteligjencës ushtarake në Ukrainë. “Ishte një çmenduri absolute. Automatikë për të gjithë,” thotë ai.

Trupat ruse bënë dy përpjekje për të sulmuar kompleksin, ndërsa familja e Zelensky ishte ende brenda.

Natën tjetër, pasi refuzoi ofertat për një mjedis më të sigurt- duke përfshirë një evakuim nga forcat amerikane dhe britanike, që do t’i mundësonte të krijonte një qeveri në mërgim- Zelenesky doli jashtë në oborr për të regjistruar në telefonin e tij një video-mesazh, që është bërë i famshëm tani.

Në atë moment, Zelenskyu thotë se u bë vërtet i vetëdijshëm për rolin e tij në luftë. “Ti e kupton se ata po të shikojnë. Ti je një simbol. Ti duhet të veprosh ashtu siç duhet të veprojë kreu i një shteti,” i tha ai revistës.