Një nga imazhet më domethënëse nga konflikti në Ukrainë i javës së kaluar ishte fotografia e një gruaje shtatzënë duke u nxjerrë me barelë nga një maternitet në Mariupol, pasi ai u bombardua. Sot, kirurgu i saj i tha televizionit ukrainas se ajo nënë dhe foshnja e saj kanë vdekur që të dy.

Këtu janë zhvillimet e tjera kryesore në pushtimin rus të Ukrainës:

Përkeqësohen luftimet rreth Kievit: Shpërthime të rënda janë dëgjuar në qytet dhe nga bombardimi i një ndërtese banimi  u vranë të paktën një person, thonë zyrtarët.

Përleshje rreth Ukrainës: Ka pasur beteja të ashpra në të gjithë vendin, duke përfshirë qytetin strategjik detar Mykolaiv. Të paktën dy persona u vranë dhe 10 u plagosën gjatë bombardimeve në periferi të saj të hënën, sipas postimit të grupit të komunitetit të qytetit në Facebook.

Numri i të vdekurve në Mariupol vlerësohet në më shumë se 2,500: Një këshilltar në zyrën e presidentit ukrainas Volodymyr Zelensky thotë se bombardimet ruse në qytetin jugor Mariupol kanë shkaktuar tani më shumë se 2,500 vdekje.

Planifikohen bisedime të reja: Raundi i katërt i bisedimeve ndërmjet negociatorëve rusë dhe ukrainas ka nisur sot me video-konferencë.

Sulmi raketor në Donetsk: Imazhet dhe videot nga Donetsk në Ukrainën lindore të hënën tregojnë viktima të shumta nga ajo që duket të ketë qenë një sulm me raketa në qytetin, i cili mbahet nga forcat separatiste të mbështetura nga Rusia dhe është kryeqyteti i të ashtuquajturës Republika Popullore e Donetskut.

Senatorët amerikanë kërkojnë të dinë mbi kërcënimin kibernetik: Një grup senatorësh po shprehin shqetësimin për potencialin e sulmeve kibernetike ruse të përhapura në Shtetet e Bashkuara si ndëshkim për sanksionet e rënda që Amerika po vendos ndaj Rusisë.