Organizata Botërore e Shëndetësisë e ka këshilluar Ukrainën që të shkatërrojë të gjithë patogjenët me kërcënim të lartë që gjenden në laboratorët e shëndetit publik për të parandaluar derdhjet e mundshme që mund të përhapin sëmundje.

Ekspertët e biosigurisë kanë paralajmëruar se lëvizja e trupave ruse në Ukrainë dhe bombardimet e qyteteve të saj rrisin rrezikun e rrjedhjes së patogjenëve që shkaktojnë sëmundje, nëse ndonjë objekt dëmtohet, raportoi Reuters.

Ukraina ka laboratorë të shëndetit publik, si disa shtete të tjera, ku bëhen kërkime shkencore për të zbutur kërcënimet e paraqitura nga sëmundjet e rrezikshme që prekin si njerëzit ashtu edhe kafshët, përfshirë Covid-19. Laboratorët e saj marrin mbështetje nga SHBA, OBSH dhe Bashkimi Evropian.

Në përgjigje të pyetjeve në lidhje me bashkëpunimin e saj me Ukrainën para dhe gjatë pushtimit, OBSH tha se kishte bashkëpunuar me laboratorët e shëndetit publik të vendit për vite me radhë për të promovuar praktikat e sigurisë që parandalojnë lëshimin e qëllimshëm ose aksidental të patogjenëve.

Si pjesë e kësaj pune, agjencia shëndetësore e Kombeve të Bashkuara i ka rekomanduar Ministrisë së Shëndetësisë të Ukrainës dhe organeve të tjera përgjegjëse që të heqin qafe patogjenët me rrezik të lartë.

OBSH nuk tregoi se kur e bëri rekomandimin ose dha specifika në lidhje me llojet e patogjenëve të vendosur në laboratorë dhe as nëse rekomandimet e saj po zbatoheshin.

Kapacitetet laboratorike të Ukrainës kanë qenë në qëndër të një lufte informacioni në rritje pas pushtimit rus dy javë më parë.

Zëdhënësja e Ministrisë së Jashtme të Rusisë, Maria Zakharova përsëriti të mërkurën një pretendim të kahershëm se SHBA-ja operonte një laborator bioluftarak në këtë shtet ish-sovjetik.

 Si SHBA ashtu edhe Ukraina i kanë mohuar herët akuzat. Zakharova tha se dokumentet e gjetura nga forcat ruse në Ukrainë treguan një përpjekje urgjente për të zhdukur provat e programeve biologjike të nivelit ushtarak, duke shkatërruar mostrat laboratorike.

Megjithatë, një zëdhënës i presidentit të Ukrainës i mohoi akuzat. Zëdhënës nga qeveria amerikane gjithashtu i mohuan akuzat dhe thanë se Rusia mund t'i përdorë këto pretendime për të përdorur armë kimike ose biologjike.

Ndërsa OBSH nuk bëri asnjë referencë për luftën biologjike, Organizata tha se i inkurajoi të gjitha palët që të bashkëpunojnë në asgjësimin e sigurt të patogjenëve që gjejnë dhe të kërkojnë ndihmë teknike kur është e nevojshme.

Të premten, Këshilli i Sigurimit i Kombeve të Bashkuara do të mbledhë një takim me kërkesë të Rusisë për të diskutuar pretendimet e Kremlinit për aktivitetet biologjike të SHBA-së në vendin e shkatërruar nga lufta.