Varshavë - Zëvendëspresidentja e SHBA Kamala Harris tha se ajo po e viziton Poloninë, një nga aleatët më lindorë të NATO-s, për të treguar përkushtimin e Shteteve të Bashkuara për sigurinë e rajonit.

"Në diskutim pikërisht në këtë moment, janë disa nga parimet udhëheqëse të aleancës së NATO-s. Dhe në veçanti, çështja e rëndësisë së mbrojtjes së sovranitetit dhe integritetit territorial dhe në këtë rast të Ukrainës," tha Harris në një konferencë shtypi. .

"Shtetet e Bashkuara janë të përgatitura të mbrojnë çdo centimetër të territorit të NATO-s. Shtetet e Bashkuara e marrin seriozisht se një sulm kundër njërit është një sulm kundër të gjithëve," tha Harris.

Duke folur së bashku me presidentin polak Andrzej Duda, Harris tha se prania e saj në Varshavë ishte një sinjal i përkushtimit amerikan ndaj aleancës ushtarake.

“Jam këtu në Poloni si një shprehje e marrëdhënieve të qëndrueshme dhe të rëndësishme, që, përsëri, ka qenë e gjatë, por në veçanti për çështjen e Ukrainës është e unifikuar dhe është e qartë: ne do të bëjmë gjithçka së bashku në partneritet, në solidaritet për të mbështetur çfarë është e nevojshme pikërisht në këtë moment për sa i përket nevojave humanitare dhe të sigurisë së Ukrainës dhe popullit ukrainas”, tha ajo.

Ajo tha se SHBA po përmbushte kërkesat për t'i dhënë Polonisë raketa Patriot.

"Ajo që na detyron gjithashtu është zemërimi moral që ndiejnë të gjitha kombet e qytetëruara kur shikojmë se çfarë po ndodh: njerëz të pafajshëm, gra, fëmijë, gjyshe, gjyshër që po ikin larg nga gjithçka," tha Harris.

Harris tha se "mizori të përmasave të paimagjinueshme" ishin duke u zhvilluar në Ukrainë.