Për më shumë se një javë, një mjek indian në Ukrainën e shkatërruar nga lufta është mbyllur në një bodrum në shtëpi me macet e tij të mëdha - një panterë e zezë dhe një jaguar.

Girikumar Patil, i cili i bleu dy kafshët e mëdha nga kopshti zoologjik i Kievit, thotë se nuk ikën nga shtëpia e tij  pa kafshët e tij të dashura. Ai ka jetuar për më shumë se gjashtë vjet në Severodonetsk, një qytet i vogël që ndodhet në rajonin Donbas të Ukrainës lindore.

Pas fillimit të luftës, z. Giri, i cili është beqar, ka dalë nga bodrumi i tij i ngushtë vetëm për të blerë ushqim për kafshët e egra - jaguari mashkull është 20 muajsh dhe pantera femër është një këlysh gjashtë muajsh – dhe del kur shtetrrethimi përfundon herët në mëngjes. Jaguari është një hibrid i rrallë midis një leopardi mashkull dhe një jaguari femër, tha ai.

Deri më tani, Giri tha se kishte blerë 23 kg mish dele, gjeldeti dhe pule nga fshatrat fqinjë me çmime katër herë më të larta se normalja.

"Kafshët e mia të mëdha kanë kaluar netë në bodrum me mua. Ka pasur shumë bombardime rreth nesh. Ato janë të frikësuara dhe po hanë më pak. Unë nuk mund t'i lë ato," tha 40- vjeçari.

"Kjo është lufta e dytë që po jetoj. Por kjo është më e frikshme".

Z.Giri tha se më parë jetonte në Luhansk, ku rebelët e mbështetur nga Rusia kanë luftuar kundër trupave ukrainase që nga viti 2014, pavarësisht një marrëveshjeje për armëpushim. Gjatë luftimeve në rajon, shtëpia e tij dhe një restorant indian që ai hapi në zonë u shkatërruan, tha ai.

Më pas ai u zhvendos në Severodonetsk, rreth 100 km (62 milje) larg, bleu një vend të ri, filloi të praktikonte mjekësinë dhe bleu kafshët e tij të reja.

"Tani jam bllokuar në një zonë lufte. Këtë herë jam shumë i shqetësuar. Prindërit më kanë telefonuar dhe më kanë kërkuar të kthehem në shtëpi, por unë nuk mund t'i lë kafshët," tha zoti Patil.

Patil, i cili vjen nga shteti indian Andhra Pradesh, tha se ai shpenzoi 35,000 dollarë për të blerë panterën dhe jaguarin nga kopshti zoologjik i Kievit rreth 20 muaj më parë. Ai tha se kopshti zoologjik lejonte shitjet private të kafshëve me kusht që pronari të kishte hapësirë ​​të mjaftueshme për t'i mbajtur ato – dhe zoti Patil tregoi certifikatat e lindjes së kafshëve të dhëna nga kopshti zoologjik.

Zoti Patil tha se ai mbërriti në Ukrainë në vitin 2007 për të studiuar mjekësi. Që nga viti 2014, ai është një mjek ortopedik dhe tani punon në një spital qeveritar në Severodonetsk, i cili u mbyll pas fillimit të luftës. Ai tha gjithashtu se punon privatisht.