Shefi i politikës së Jashtme të Bashkimit Europian, Josep Borrell, ka bërë thirrje për një takim urgjent të Këshillit të Sigurimit të OKB-së pas një sulmi ndaj centralit bërthamor të Zaporizhzhia të Ukrainës nga forcat ruse, duke paralajmëruar se sulme të tilla mund të kenë pasoja "katastrofike".

“Sulmet ruse në afërsi dhe drejtpërdrejt termocentraleve bërthamore të Ukrainës mund të kenë pasoja katastrofike. Ata duhet t'i ndalojnë menjëherë”, shkroi Borrell në Twitter të premten.

“Artileria dhe zjarri që rezultuan në termocentralin (Zaporizhzhia) mund të rrezikojnë të gjithë Evropën,” shtoi ai.

Të premten, Inspektorati Rregullator Shtetëror Bërthamor i Ukrainës tha se forcat ruse kishin "uzurpuar" termocentralin bërthamor të Zaporizhzhia.

Sipas një deklarate të ndarë nga Energoatom - operatori i energjisë bërthamore i Ukrainës - përmes aplikacionit Telegram të premten, personeli i uzinës vazhdon të punojë në njësitë e energjisë, "duke siguruar funksionimin e qëndrueshëm të objekteve bërthamore".