Një vonesë e qeverisë japoneze në nxjerrjen e vaksinave përforcuese të Covid-it e bëri atë më të prekshme se vendet e tjera të pasura kur varianti Omicron solli një rritje të vdekjeve, thanë ekspertët, qeveritë vendore dhe një ish-zyrtar i vaksinave.

Çështja mund të nënkuptojë probleme politike për kryeministrin Fumio Kishida pasi gati 30% e popullsisë është e moshës 65 vjeç ose më të vjetër, dhe kështu në rrezik më të madh nga koronavirusi pa mbrojtjen e dozave përforcuese, raportoi Reuters.

Paraardhësi i Kishida dha dorëheqjen pas kritikave të përhapura për trajtimin që i bëri pandemisë dhe partia në pushtet e kryeministrit përballet me një sprovë të rëndësishme me zgjedhjet e  Dhomës së Lartë këtë vit.

Të martën, Japonia pati 236 vdekje të reja, numri i saj më i keq ndonjëherë brenda një dite nga Covid. Megjithëse Japonia ishte relativisht e ngadaltë në nisje të fushatës së  vaksinimit, ajo avancoi shpejt dhe deri në nëntor kishte shkallën më të lartë të vaksinimit brenda vendeve të G7-ës.

Hidekiyo Tachiya, kryebashkiake e qytetit Soma në veri të Japonisë dhe kryetar i një shoqate kombëtare të drejtuesve komunalë, u takua me Kishida në tetor për t'i bërë presion për një fillim të hershëm të dozave përforcuese. Por asgjë nuk u dha deri në dhjetor, dhe më pas vetëm për mjekët dhe punonjësit e kujdesit shëndetësor.

"Nëse ata do të na kishin thënë në nëntor, se gjashtë muaj do të mjaftonin, atëherë në Soma mund të kishim marrë dozat që nga dhjetori dhe për këtë ndjej pakënaqësi," i tha Reuters Tachiya, e cila është mjeke. "Nëse do të jepeshin më shpejt, nuk do të kishte kaq shumë vuajtje dhe kaq shumë njerëz nuk do të kishin vdekur."

Autoritetet në Tokio kërkuan gjithashtu dozave përforcuese më shpejt, por pa dobi.

"Ne e kërkuam këtë injeksion të radhës sa më shpejt të ishte e mundur, por qeveria nuk u pajtua plotësisht," u tha gazetarëve së fundmi guvernatori i Tokios, Yuriko Koike.

Një zëdhënës i Ministrisë së Shëndetësisë tha se vonesa 8-mujore midis vaksinave u vendosën nga një këshill i shkencave shëndetësore dhe sistemi u modifikua në dhjetor dhe janar për t'iu përgjigjur kërcënimit të omicron.

'Të fshikullohen'

Shefi i vaksinave në qeverinë e mëparshme, Taro Kono, tha se problemi ishte një shërbim civil i ngadalshëm.

"Dështim ishte Ministria e Shëndetësisë," i tha Reuters në një intervistë Kono, i cili mbetet një zyrtar i lartë në Partinë Liberal Demokratike në pushtet. “I kam thënë Zyrës së Kryeministrit, duhet të keni kujdes sepse Ministria e Shëndetësisë nuk do t’ju ​​ndihmojë”, tha ai.

“Duhet me të vërtetë t’i fshikulloni për t’i vënë gjërat në lëvizje”.

Kono, i cili është vlerësuar nga publiku dhe ekspertët e shëndetit për rolin e tij në aksionin e vaksinimit, tha se ndërhyrja ishte thelbësore për t'i bërë gjërat shpejt.

Me shenja se vala e omicron po arrin kulmin, programi përforcues, të cilin Kishida është zotuar të kryesojë, më në fund po merr hov. Ministria e Shëndetësisë tha këtë javë se do të blinte dhe importonte 10 milionë doza të tjera Pfizer deri në mars.

Ndërsa infeksionet e reja janë në rënie, vdekjet janë një tregues i njejtë dhe ende në rritje. Gati 2,000 njerëz kanë vdekur nga koronavirusi në Japoni në shkurt.

Vonesa mund të bëhet problem për Kishida, tha komentatori politik Atsuo Ito. "Ne jemi shumë pas kombeve të përparuara," tha Ito. “Koreja, pikërisht vendi fqinj, po fillon tashmë të japë dozat e katërta”.