Një valë e re infeksionesh nga varianti Omicron i koronavirusit po shkon  drejt Evropës Lindore, tha të martën Organizata Botërore e Shëndetësisë, duke u kërkuar autoriteteve të përmirësojnë vaksinimin dhe masat e tjera.

Gjatë dy javëve të fundit, rastet e COVID-19 janë më shumë se dyfishuar në Armeni, Azerbajxhan, Bjellorusi, Gjeorgji, Rusi dhe Ukrainë, tha në një deklaratë drejtori rajonal i OBSH-së për Evropë, Hans Kluge.

Komentet vijnë në një kohë kur disa vende evropiane, përfshirë Republikën Çeke dhe Poloninë, kanë lënë të kuptohet për lehtësimin e kufizimeve të COVID-19 muajin e ardhshëm nëse numri i infeksioneve ditore vazhdon të bjerë.

OBSH, megjithatë, theksoi nevojën e vazhdueshme për masa të tilla si testimi i shpejtë dhe maskat, duke thënë se mbi 165 milionë raste COVID-19 janë regjistruar deri më tani në të gjithë rajonin evropian të OBSH-së, me 25,000 vdekje në javën e kaluar.

“Përballë valës së baticës Omicron dhe me Delta-n që ende qarkullon gjerësisht në lindje, kjo situatë shqetësuese nuk është në momentin e heqjes së masave që ne e dimë se funksionojnë në reduktimin e përhapjes së COVID-19”, tha Kluge.

Ai u bëri thirrje gjithashtu qeverive të shqyrtojnë shkaqet vendore për normat e ulëta të vaksinimit. Më pak se 40% e atyre të moshës mbi 60 vjeç në Bosnje dhe Hercegovinë, Bullgari, Kirgistan, Ukrainë dhe Uzbekistan e kanë mbyllur serinë e vaksinave kundër COVID-19, tha ai.