Miliarderi Elon Musk ka dhuruar rreth 5.7 miliardë dollarë të aksioneve të kompanisë së prodhimit të makinave elektrike ‘Tesla” për bamirësi.

Dhurimi i aksioneve u zbulua në një dosje në Komisionin e Letrave me Vlerë dhe Shkëmbim të SHBA.

Aksionet u dhuruan vitin e kaluar midis 19 nëntorit dhe 29 nëntorit, sipas dosjes, por nuk dihet se kush është përfituesi.

Kjo bamirësi e bën Musk donatorin e dytë më të madh të SHBA-së në vitin 2021. Drejtori i Përgjithshëm i Tesla-s pason Bill Gates dhe Melinda French Gates, të cilët dhanë 15 miliardë dollarë vitin e kaluar, në një renditje vjetore nga “Chronicle of Philanthropy”.

Regjistrimet e mëparshme të letrave me vlerë tregojnë se Musk shiti aksione të Tesla-s me vlerë mbi 16 miliardë dollarë në dy muajt e fundit të 2021, ku shumica e të ardhurave do të paguanin një faturë tatimore federale të SHBA-së rreth 11 miliardë dollarë. Aksionet e dhuruara nuk i nënshtrohen tatimit mbi fitimet kapitale dhe vlera e tyre mund të përdoret si një zbritje për të ndihmuar në kompensimin e faturës tatimore.

Tesla nuk u përgjigj menjëherë kur u pyet për më shumë detaje mbi aksionet e dhuruara. Musk ka krijuar një fondacion që jep grante në mbështetje të kauzave, duke përfshirë kërkimin pediatrik dhe edukimin shkencor, por ka pak detaje në faqen e saj të internetit.

Musk, njeriu më i pasur në botë, u sfidua vitin e kaluar nga drejtori i Programit Botëror të Ushqimit të OKB-së për të bërë një donacion që do të ndihmonte në zgjidhjen e urisë në botë. Por, Programi Botëror i Ushqimit nuk e konfirmon nëse donacioni I është dhënë organizatës.