Athinë - Vrasja e një tifozi të futbollit në moshë të re ka bërë që autoritetet në Greqi të përpiqen të ashpërsojnë rregullat për shoqatat e tifozëve.

Alkis Kambanos u godit me thikë dhe u rrah rëndë nga një bandë të rinjsh në qytetin e Selanikut javën e kaluar.

Viktima 19-vjeçare ka mbështetur skuadrën vendase, Aris, ndërsa sulmuesit e tij dyshohet se janë tifozë të klubit rival PAOK. Të plagosur kanë mbetur edhe dy të tjerë.

Nëntë persona janë arrestuar për sulmin fatal të 1 shkurtit. Urdhër arresti janë lëshuar edhe për dy të dyshuar të tjerë.

Vrasja ka tërhequr reagime të fuqishme nga udhëheqësit politikë në të gjithë Greqinë.

“Ne do të përballemi me tifozët e dhunshëm”, u tha gazetarëve të hënën zëdhënësi i qeverisë, Giannis Oikonomou.

“Është detyra jonë ndaj shoqërisë dhe veçanërisht ndaj brezit të ri, por edhe ndaj komunitetit tonë të shëndetshëm sportiv dhe miliona tifozëve të mirë në vendin tonë.”

Oikonomou tha se qeveria do të paraqesë një projekt-ligj të ri në parlament muajin e ardhshëm, ku përfshihen dënime më të ashpra dhe ndëshkime për mbështetësit e dhunshëm të futbollit.

Legjislacioni i propozuar do të përfshijë gjithashtu rregulla të reja funksionimi për klubet e tifozëve, të përdorura shpesh për të organizuar sulme.

Pas vrasjes, policia bastisi klubet e shumta të tifozëve të futbollit në Selanik dhe kryeqytetin grek Athinë, duke konfiskuar dhe disa armë.

Nënkryetari i Komisionit Evropian, Margaritis Schinas - edhe vetë nga Selaniku - vizitoi vendin e vrasjes gjatë fundjavës me lule.

“Dhuna, fanatizmi dhe urrejtja e disave nuk do të na thyejnë”, shkroi Schinas në Tëitter. "Ata prej nesh që e duan dhe i shërbejnë sportit janë të shumtë dhe janë më të fortë."