Athinë, Greqi  - Qindra njerëz marshuan në qëndër të Athinës të dielën për të protestuar ndaj asaj që ata thonë se janë shtyrjet prapa që u bën Greqia emigrantëve dhe refugjatëve në kufirin me Turqinë.

Marshuesit mbanin një gomone me ajër, si ato që emigrantët përdorin për të kaluar detin nga Turqia, dhe një pankartë ku shkruhej "Ndaloni shtyrjet, ndaloni dhunën në kufi".

Protesta pasoi një të ngjashme të shtunën në Stamboll të organizuar nga grupe humanitare turke që marshuan drejt konsullatës greke për të protestuar kundër vdekjes së fundi të 19 emigrantëve pranë kufirit të Turqisë me Greqinë. Të paktën një udhëheqës i marshimit në Turqi akuzoi se autoritetet greke kishin marrë veshjet e emigrantëve përpara se t'i shtynin ata të vdisnin në temperatura të ulta.

Por zyrtarët grekë thonë se emigrantët që vdiqën nuk kishin ardhur në kufi.

Turqia ka pretenduar shpesh se Greqia kryen kthimin mbrapsht të emigrantëve që kërkojnë të kalojnë kufirin tokësor veriperëndimor ose që përpiqen të arrijnë në ishujt e detit Egje të Greqisë.

Greqia e mohon me forcë akuzën, megjithëse qeveria ka marrë meritën për patrullimin më të mirë të kufijve tokësorë dhe detarë, duke ulur ndjeshëm fluksin e emigrantëve.