Maroku u përgatit për të varrosur të hënën "Rayanin e vogël", djalin pesëvjeçar që vdiq i bllokuar në një pus, pavarësisht një operacioni shpëtimi disaditor që mbërtheu botën.

Fati i fëmijës tërhoqi vëmendjen e mbarë botës pasi ai ra në një pus të ngushtë 32 metra, të thatë, të martën e kaluar dhe shkaktoi një vërshim simpatie në internet.

Funerali i tij do të mbahet në fshatin e tij të lindjes, Ighrane, në malet e shkreta Rif në veri të Marokut ku ndodhi tragjedia, i tha AFP-së një zyrtar vendor dhe një i afërm.

Natën e së shtunës, turmat brohoritën nga gëzimi kur punonjësit e shpëtimit arritën tek Rayan pas një operacioni gërmimi gjatë gjithë javës, duke hequr me duar grushtat e fundit të dheut.

Por shpresa u kthye në pikëllim pasi u përhap lajmi se shpëtimi kishte arritur shumë vonë dhe Rayan kishte vdekur.

“Heshtja është e tmerrshme sot në mëngjes në fshat”, tha një i afërm.

Lajmi u bë i ditur nga kabineti mbretëror i këtij vendi të Afrikës Veriore, pasi mbreti Mohammed VI u dha prindërve, ngushëllimet e tij.

“Falënderojmë madhërinë e tij mbretin, autoritetet dhe të gjithë ata që na kanë ndihmuar”, tha babai i Rayan, Khaled Aourram, të shtunën në mbrëmje. "Lavdi Zotin, mëshirë për të vdekurit."

Trupi i Rayan u dërgua në një spital ushtarak në Rabat, sipas një kushëriri, megjithëse nuk është dhënë asnjë raport për ndonjë autopsi.

Operacioni për të shpëtuar Rayan u ndoq drejtpërdrejt në të gjithë botën dhe sapo u njoftua përfundimi tragjik, homazhet vërshuan.

Papa Françesku, teksa mbante zi për humbjen e djalit, vlerësoi pamjen e mrekullueshme të asaj se "si të gjithë njerëzit u mblodhën së bashku" në përpjekje për të shpëtuar një fëmijë.