Kundërshtarët e sundimit ushtarak në Mianmar përkujtuan njëvjetorin e marrjes së pushtetit nga ushtria me një grevë mbarëkombëtare të martën për të treguar forcën dhe solidaritetin e tyre mes shqetësimeve për atë që është bërë një përplasje gjithnjë e më e dhunshme për pushtet.

"Greva e pazëshme" synoi zbrazjen e rrugëve të qyteteve dhe qytezave të Mianmarit duke i bërë njerëzit të qëndronin në shtëpi dhe bizneset të mbyllnin dyert e tyre nga ora 10 e mëngjesit deri në 4 pasdite.

Në Yangon, qyteti më i madh i vendit, dhe gjetkë, fotot në mediat sociale tregonin se rrugët që normalisht janë të ngarkuara, ishin pothuajse bosh.

Përvjetori ka tërhequr gjithashtu vëmendjen ndërkombëtare, veçanërisht nga vendet perëndimore që kritikuan grushtin e shtetit,  si Shtetet e Bashkuara.

Presidenti Joe Biden në një deklaratë i bëri thirrje ushtrisë që të ndryshojë veprimet e saj, të lirojë udhëheqësen civile të rrëzuar të vendit Aung San Suu Kyi dhe të burgosur të tjerë dhe të angazhohet në dialog kuptimplotë për ta kthyer Mianmarin në rrugën drejt demokracisë.