Në ditën kur Koreja e Veriut testoi raketën e saj të parë të vitit, presidenti i Koresë së Jugut Moon Jae-in ishte në qytetin kufitar Goseong, për të marrë pjesë në një ceremoni themelimi për një linjë hekurudhore që ai shpreson se një ditë do të rilidhë gadishullin e ndarë Korean. 

Duke shprehur shqetësimin se testi i 5 janarit rrezikoi destabilizimin e mëtejshëm të lidhjeve ndërkoreane, Moon theksoi se qeveria e tij nuk do të heqë dorë nga shpresa për rifillimin e bisedimeve të paqes.

'Vetëm dialogu mund ta kapërcejë thelbësisht këtë situatë. Nëse të dyja Koretë punojnë së bashku dhe ndërtojnë besim, paqja do të arrihet një ditë." " tha presidenti i Koresë së Jugut. 

Që nga marrja e detyrës pesë vjet më parë, Moon ka bërë përpjekje të paprecedentë për të angazhuar Kim Jong Un të Koresë së Veriut

Në muajt e fundit, Moon, i cili do të largohet nga detyra në maj, ka shtuar përpjekjet për të rikthyer procesin e paqes në rrugën e duhur, duke lobuar në SHBA dhe Kinë – të dyja të përfshira në Luftën Koreane – për mbështetjen e tyre për të deklaruar zyrtarisht konfliktin e përfunduar. 

Në një fjalim të fundit në Asamblenë e Përgjithshme të Kombeve të Bashkuara, Moon tha se nëse të gjitha palët kryesore të përfshira në konflikt "shpallin fundin e Luftës, unë besoj se ne mund të bëjmë përparim të pakthyeshëm në denuklearizimin dhe të sjellim një epokë paqeje të plotë".

Propozimi ka mbështetjen e shumicës së publikut të Koresë së Jugut, por ka ndarë ekspertët. 

Disa thonë se mund të ndihmojë në thyerjen e ngërçit diplomatik në gadishullin Korean, ndërsa të tjerë kanë frikë se mund të kërcënojë sigurinë e Koresë së Jugut, duke përfshirë edhe minimin e aleancës mbrojtëse të vendit me Shtetet e Bashkuara.