"Glade of Light" përbëhet nga një "aureolë" prej mermeri të bardhë që mban emrat e të vrarëve në sulmin me bomba në maj të 2017-ës

Një memorial për 22 personat e vrarë në sulmin terrorist në Manchester Arena do të hapet zyrtarisht për publikun që nga e mërkura. Memoriali Glade of Light është një "aureolë" prej mermeri të bardhë që mban emrat e të vrarëve në sulmin e majit të 2017-ës.

Familjet e atyre që humbën të dashurit kanë mundur të bëjnë kapsula kujtese të personalizuara, që përmbajnë kujtime dhe mesazhe, të cilat janë ngulur brenda aureolës.

Atyre u është dhënë gjithashtu mundësia që ta vizitojnë privatisht përpara hapjes, memorialin.

Homazhi është konceptuar si një memorial i gjallë - një hapësirë ​​kopshti paqësore për kujtim dhe reflektim, me bimë që rriten natyrshëm nga fshatrat e Mbretërisë së Bashkuar dhe janë përzgjedhur për të ofruar ngjyra gjatë gjithë vitit dhe për t'i bërë jehonë stinëve në ndryshim.

Çdo vit rreth përvjetorit, më 22 maj, do të lulëzojnë lulet e bardha të një murrizi të mbjellë në qendër të memorialit.

Udhëheqësi i këshillit të qytetit të Mançesterit, Bev Craig, tha: “Nuk do t'i harrojmë kurrë ata që u humbën jetën më 22 maj 2017. Atae kishin  një vend të përhershëm në zemrat e njerëzve të Mançesterit. Tani ata kanë një memorial të qëndrueshëm në zemër të qytetit tonë.

“The Glade of Light është një nderim i bukur për ta dhe diku që do të ketë gjithashtu një kuptim të thellë për të gjithë të prekur nga sulmi. Shpresojmë që vendi përkujtimor të jetë një vend paqeje dhe rehatie, duke qëndruar si një kujtesë se dashuria është më e fortë se urrejtja.”

Gardhet rreth vendit, ku filloi puna në mars të vitit të kaluar, do të hiqen që publiku të mund të vizitojë memorialin të mërkurën. Një ceremoni zyrtare e hapjes është planifikuar për pranverën e vitit 2022, përpara përvjetorit të pestë të sulmit.

Memoriali ndodhet midis Katedrales së Mançesterit dhe Shkollës së Muzikës Chetham, në këmbët e Rrugës Fennel ku takohet me Rrugën Victoria.