Paris - A do ta kalojnë francezët natën e Vitit të Ri me pantofla këtë vit? Ky ishte titulli i së përditshmes franceze Le Parisien, ndërsa revista e përjavshme Le Point e përmblodhi dilemën me tre fjalë: "Soirée ou canapé?" – një mbrëmje jashtë apo një mbrëmje në divan? Kjo është pyetja që bëhet në familjet në të gjithë Francën përpara natës së Vitit të Ri, pasi rastet e Covid-19 në vend rriten në nivele të paprecedentë.

Disa po vendosin të vazhdojnë me festimet pavarësisht rasteve në rritje. Ramez Sabah, i cili jeton në qytetin perëndimor të Angers me familjen e tij, gjithmonë e bën Vitin e Ri me një grup të vogël miqsh dhe ky vit nuk do të jetë përjashtim.

"Ne nuk mund të vazhdojmë të jetojmë kështu dhe të shmangim njerëzit e tjerë," tha ai për FRANCE 24. Çifti është plotësisht i vaksinuar dhe e sheh variantin Omicron si më pak të dëmshëm, kështu që ata janë më pak të shqetësuar për kapjen nga virusi.

Autoritetet e shëndetit publik të Francës kanë thënë se Omicron shkakton më pak shtrime në spital sesa varianti më i rrezikshëm Delta, por qeveria ka theksuar se rritja me gjashtë ose shtatë herë e rasteve, do ta vendoste sërish sektorin shëndetësor nën tendosje.

Për Vincent Gomez dhe partneren e tij Sophie Calzia, të cilët jetojnë në Marsejë, nuk bëhej fjalë të anuloheshin planet për natën e Vitit të Ri. Ata do të shkojnë në Alpe me një grup miqsh për disa ditë skii dhe një festë në datën 31. Gomez i tha FRANCE 24 se nuk ishte veçanërisht i shqetësuar për Covid-19: Ata që marrin pjesë në festë që kanë qenë në kontakt me një rast Covid ,do të testohen para se të mbërrijnë, dhe ai dhe Calzia jo vetëm që janë vaksinuar plotësisht, por edhe janë kapur nga Covid vetëm disa muaj më parë.

“As nuk na ka shkuar në mendje të mos shkojmë. Ne ishim shumë të prirur të paketonim valixhet dhe të largoheshim për pak, "tha ai, duke shtuar se grupi i miqve planifikoi të hapte dritaret dhe  t'i përmbahej distancimit social gjatë natës.

"Edhe pse pasi festa të fillojë, unë mendoj se ato masa paraprake ndoshta do të harrohen," tha ai me I zymtë.

Një dallgë rastesh

Më 29 dhjetor, pati një rekord 208,000 rastesh Covid-19 të zbuluara në Francë gjatë 24 orëve, duke mposhtur një rekord të mëparshëm të vendosur vetëm një ditë më parë prej 180,000 testesh pozitive Covid-19 në ditë.

Olivier Véran, Ministri i Shëndetësisë i vendit, e karakterizoi atë si një "valë baticore". “Kjo do të thotë që 24/7, ditë e natë, çdo sekondë, dy francezë po rezultojnë pozitivë për koronavirus”, shpjegoi ai. “Nuk kemi përjetuar kurrë diçka të tillë.”

Samuel (një emër i supozuar për të mbrojtur identitetin e tij) është një mjek i ri në departamentin e urgjencës në Spitalin Beaujon në Clichy, pak jashtë qendrës së Parisit. Ai thotë se kur filloi të punonte në departament në nëntor, ata shihnin vetëm rreth një rast Covid-19 në ditë. Tani, kjo shifër është shumëfishuar – dhe ai thekson se janë kryesisht njerëz të pavaksinuar ata që po zënë shtretërit e spitaleve me forma më të rënda të Covid.

"Po na mbarojnë shtretërit," shpjegoi ai. “Na mungon stafi, na mungojnë pajisjet. Dhe gjatë gjithë kohës, qeveria po investon miliarda euro për testime dhe vaksinime. Farmacitë dhe mjekët kanë analiza pafund, por nuk ka para për spitalet publike”.