Si i festoni Krishtlindjet në pikën më të largët në Tokë, ku supermarketi më i afërt është pesë orë me avion - ose katër ditë larg udhëtim me varkë - dhe ku pinguinët i tejkalojnë njerëzit 12,000 kokë për  njeri?

Kjo është sfida me të cilën disa mijëra punonjës nga kombe të ndryshme pe po kalojnë këtë Krishtlindje në Antarktidë, duke punuar mbi baza shkencore dhe kërkimore.

Përgjigja? Gjithçka ka të bëjë me logjistikën.

“Ne jemi në një bllok akulli në këtë stacion, kështu që fjalë për fjalë gjithçka që mund të shihni është bora dhe akulli kudo, dhe ka 24 orë ditë, gjë që është shumë e çuditshme e pak konfuze dhe që duhet të përpiqeni të mësoheni,” shpjegon Millie Bond, një studiuese, profesor doktor në Agjencinë Britanike të Survejimit të Antarktidës.

Britania është një nga një duzinë vendesh evropiane që mbajnë stacione kërkimore në Antarktidë gjatë verës ose dimrit –  përfshirë Gjermaninë, Norvegjinë, Francën, Spanjën, Rusinë, Italinë – dhe një mori vendesh të tjera si Kina, SHBA, Zelanda e Re dhe Argjentina.

“Është e gjitha një situatë mjaft sfiduese, veçanërisht në këtë stacion,” thotë Millie, e cila mbërriti në Stacionin Halley gjatë nëntorit, pasi kaloi dy javë në karantinë në Afrikën e Jugut.

"Ata nuk kanë sjellë anije për ngarkesë prej një kohe të gjatë, kështu që ngarkesa që mund të sjellim është shumë e kufizuar, aq sa mund të sjellë një aeroplan dhe sa fluturime mund të bëjë," shton ajo. .

Nëse kontigjenti prej 33 trupash në Stacionin Halley është me fat, ngarkesa që mbërrin nga një bazë më e madhe britanike në Stacionin Rothera mund të ketë disa gjëra të mira për Krishtlindje në bord.

Dita e Krishtlindjes është e lëvizshme në Antarktidë

Meqenëse shumë nga puna që shkencëtarët bëjnë në Antarktidë varet nga moti i mirë për të operuar jashtë, ata nuk mund të harxhojnë asnjë ditë për të festuar Krishtlindjet nëse moti është i mbarë.

"Normalisht, unë do të kisha një Krishtlindje shumë të orientuar nga familja, ose vetëm në shtëpi me prindërit e mi ose duke shkuar për të parë anëtarët e tjerë të familjes në pjesë të tjera të Britanisë", tha Millie Bond. "Po këto Krishtlindje mendoj se do të jenë krejt ndryshe."

“Para së gjithash, vetë dita e Krishtlindjes është mjaft e lëvizshme, sepse ne jemi në mëshirën e motit, kështu që nëse ka një ditë me mot të keq kur askush nuk mund të kryejë ndonjë punë, ka kuptim që Krishtlindjet të zhvendosen në atë ditë dhe të kemi një darkë të madhe Krishtlindjesh të gjithë së bashku, nëse njerëzit nuk do të munden të bëjnë shumë punë,” thotë Millie.

Stacioni Halley, i themeluar për herë të parë në 1956, është një bazë e çmontueshme pranë detit Weddell. Stacioni është ndërtuar mbi ski, në mënyrë që të mund të zhvendoset nëse blloku i akullit i afrohet detit të hapur. Ndodhi këtu që shkencëtarët zbuluan për herë të parë vrimën në shtresën e ozonit në vitet 1980.

Temperaturat në këtë kohë të vitit mund të ulen shumë nën zero - madje duke arritur -50°C në mes të dimrit.

“Përsa i përket temperaturës mendoj se sot është relativisht e ngrohtë”, thotë Millie për Euronews. “Është -1°C, por për shkak se era është mjaft e fortë, ndihet si -10°C”, tregon ajo.