Më shumë se 500 njerëz janë hospitalizuar për shkak të pickimit nga akrepat në jug të Egjiptit, pasi stuhia bëri që këto krijesa të dilnin nga vendet e fshehura dhe të futeshin në shtëpitë e njerëzve, raportuan mediet shtetërore.

Gjatë fundjavës, provinca Aswan u godit nga një stuhi e rrallë shiu e breshëri, me ç’rast u shënuan tri viktima, tha guvernatori Ashraf Attia. Megjithatë, personave që u pickuan nga akrepat u është dhënë ilaç kundër helmimit dhe më vonë janë liruar nga spitali.

Ministri në detyrë i Shëndetësisë, Khalid Abdel-Ghafar, konfirmoi përmes një deklarate se nuk ka të vdekur në grupin e personave të pickuar nga akrepat, shkruan The Guardian, transmeton Gazeta Express.

Pamjet e publikuara në rrjetet sociale shfaqën rrugë të vërshuara e shtëpi të dëmtuara. Mësimi në shkolla u pezullua, ndërsa në rajon u raportua edhe për ndërprerje të rrymës. U ndërpre edhe qarkullimi i barkave në Nil.

Nënsekretari i Ministrisë së Shëndetësisë, Ehab Hanafy, citohet të ketë thënë se mjekët janë thirrur nga pushimi vjetor dhe spitalet janë vënë në gjendje të lartë gatishmërie.

Ministria e Shëndetësisë e siguroi publikun se ka doza të mjaftueshme kundër helmimit dhe se mbi 3.000 të tilla i ka vetëm në Aswan. Hanafy tha se doza shtesë janë dërguar afër zonave malore e shkretinore.