OBSH paralajmëron Evropën, është përsëri në epiqendër të pandemisë COVID

Evropa është edhe një herë "në epiqendrën" e pandemisë Covid, ka paralajmëruar Organizata Botërore e Shëndetësisë  pasi rastet po ngrihen fluturim në të gjithë kontinentin.

Në një konferencë për shtyp, kreu i OBSH-së për Evropën, Hans Kluge tha se kontinenti mund të pësojë edhe gjysmë milioni vdekje të tjera deri në shkurt.

Ai fajësoi për këtë, marrjen e pamjaftueshme të vaksinave.

"Ne duhet të ndryshojmë taktikat tona, nga reagimi ndaj rritjeve të rasteve me Covid-19, tek parandalimi i tyre në radhë të parë," tha ai.

Shkalla e vaksinimit është ngadalësuar në të gjithë kontinentin muajt e fundit. Ndërsa rreth 80% e njerëzve në Spanjë janë vaksinuar dy herë, ky numër është më i ulët në Francë dhe Gjermani - në 68% dhe 66% respektivisht - dhe akoma më i ulët në disa vende të Evropës Qendrore dhe Lindore. Vetëm 32% e rusëve u vaksinuan plotësisht deri në tetor 2021.

Z. Kluge fajësoi gjithashtu një lehtësim të masave të shëndetit publik për rritjen e infeksioneve në rajonin evropian të OBSH-së, i cili mbulon 53 shtete duke përfshirë edhe pjesë të Azisë Qendrore. Deri më tani OBSH ka regjistruar 1.4 milionë vdekje në të gjithë rajonin.

Drejtuesja teknike e OBSH-së për Covid-19, Maria Van Kerkhove, tha se gjatë katër javëve të fundit rastet në të gjithë Evropën ishin rritur mbi 55%, pavarësisht një "furnizimi të bollshëm të vaksinave dhe pajisjeve", dhe kolegu Dr Mike Ryan tha se përvoja e Evropës ishte " goditje paralajmëruese për botën”.

Kjo erdhi pasi Gjermania regjistroi pothuajse 34,000 raste të përditshme me Covid në 24 orët e fundit, një rritje rekord.

Ndërsa rastet me Covid në Gjermani janë nën shifrat e fundit të rasteve ditore në Mbretërinë e Bashkuar prej më shumë se 37,000, zyrtarët e shëndetit publik janë të shqetësuar se një valë e katërt e infeksionit mund të çojë në një numër të madh vdekjesh dhe presion mbi sistemin shëndetësor. Në 24 orët e fundit janë regjistruar 165 vdekje, nga 126 një javë më parë.

Lothar Ëieler nga instituti gjerman RKI foli për shifra të tmerrshme. "Nëse nuk marrim kundërmasa tani, kjo valë e katërt do të sjellë akoma më shumë vuajtje," tha ai. Në mesin e shumë gjermanëve që nuk janë vaksinuar janë më shumë se tre milionë të moshës mbi 60 vjeç, të parët në rrezik të veçantë.

Por siç theksoi Hans Kluge, rritja e rasteve nuk kufizohet vetëm në Gjermani.

Rritjet më dramatike të vdekjeve kanë qenë javën e kaluar në Rusi, ku u regjistruan më shumë se 8,100 vdekje, dhe Ukrainë, me 3,800 vdekje. Të dy vendet kanë shkallë shumë të ulët të vaksinimit dhe Ukraina njoftoi një rekord 27,377 raste të reja në 24 orët e fundit.