Islamabad  - Zyrtarë të lartë talebanë dhe përfaqësues të SHBA do të zhvillojnë bisedime të shtunën dhe të dielën lidhur me kontrollin mbi grupet ekstremiste në Afganistan dhe lehtësimin e evakuimit të shtetasve të huaj dhe afganë nga vendi, thanë zyrtarët nga të dyja palët.

Ky është takimi i parë i këtij lloji që kur forcat amerikane u tërhoqën nga Afganistani në fund të gushtit, duke i dhënë fund një pranie ushtarake 20-vjeçare atje dhe ngritjes së talibanëve në pushtet. Bisedimet do të zhvillohen në Doha, kryeqyteti i shtetit të Katarit në Gjirin Persik.

Zëdhënësi i talebanëve Suhail Shaheen, i cili është i vendosur në Doha, i tha Associated Press të shtunën se bisedimet gjithashtu do të rishikojnë marrëveshjen e paqes që talebanët nënshkruan me Uashingtonin në vitin 2020. Marrëveshja kishte hapur rrugën për tërheqjen përfundimtare të SHBA.

“Po, ka një takim…në lidhje me marrëdhëniet dypalëshe dhe zbatimin e marrëveshjes së Dohas," tha Shaheen. " Ai mbulon tema të ndryshme."

Terrorizmi gjithashtu do të diskutohet në bisedime, tha një zyrtar i dytë i cili foli në kushte anonimiteti sepse nuk ishte i autorizuar të fliste me mediat.