AFP ka përpiluar një përmbledhje të kërkesave të vaksinimit të vendeve të ndryshme, pas vendimit të fundit të administratës Biden që do të kërkojë që 100 milion punëtorë të vaksinohen.

E detyrueshme

Taxhikistani dhe Turkmenistani, janë ndër shtetet e pakta që i kanë bërë vaksinimet të detyrueshme për të gjithë të rriturit.

Vatikani - shteti më i vogël në botë - gjithashtu ka vaksinim të detyrueshëm për të gjithë të rriturit.

Territori francez i Paqësorit Jugor të Kaledonisë së Re ka thënë se do ta bëjë vaksinimin të detyrueshëm për të gjithë banorët dhe vizitorët e tij.

Punonjësit e shëndetit dhe të përkujdesit

Personeli i kujdesit shëndetësor francez, punonjësit e azileve dhe të tjerët që punojnë me njerëz të cenueshëm kanë afat deri të mërkurën për t'u vaksinuar.

Punonjësve grekë të shëndetësisë iu është kërkuar të vaksinohen që nga 1 shtatori.

Mjekët italianë dhe punonjësit e shëndetit duhet të vaksinohen ose do të përballen me ndalimin për të punuar drejtpërdrejt me pacientët. Vaksinimet do të jenë të detyrueshme për punonjësit e azileve që nga 10 tetori. Ndërkohë, stafi dhe studentët e pavaksinuar të shkollës dhe universitetit duhet të tregojnë dëshmi të një testi negativ çdo dy ditë.

Britania do të kërkojë që kushdo që punon në një shtëpi të kujdesit të vaksinohet plotësisht deri më 11 nëntor.

Hungaria ka thënë se vaksinimi do të bëhet i detyrueshëm për kujdestarët.

Kërkesa të mëtejshme

Qeveria kanadeze ka thënë se të gjithë punonjësit federalë duhet të vaksinohen deri në fund të shtatorit dhe shumica e udhëtarëve të hekurudhave, avionëve dhe anijeve gjithashtu duhet të marrin dozat.

Në Rusi, Moska dhe Shën Petersburgu kanë urdhëruar vaksina të detyrueshme për këdo që punon në industrinë e shërbimeve.

Kazakistani ka urdhëruar punëtorët në sektorë që fillojnë që nga industria e shërbimeve deri tek bankat dhe argëtimi të vaksinohen ose të kufizohen nga puna ballë për ballë.

Fixhi ka prezantuar një politikë "pa vaksinë, s’ka punë" për nëpunësit publikë dhe punonjësit e sektorit privat.

Vaksinimi ka qenë i detyrueshëm në Guinenë Ekuatoriale që nga 20 korriku për profesionet përfshirë ushtrinë, punonjësit e shëndetësisë dhe mësuesit.

Gambia e ka bërë vaksinimin të detyrueshëm për punëtorët në sektorin turistik.

Zimbabve tha të mërkurën se zyrtarët do të detyroheshin të jepnin dorëheqjen nëse nuk vaksinoheshin.

Rreth 20 autoritete lokale kineze përfshirë qytetin Chuxiong në provincën Yunnan kanë paralajmëruar se banorët e pavaksinuar mbi 18 vjeç së shpejti nuk do të pranohen më në spitale, shkolla apo në transportin publik.